Noordnederlandse Historiebijbel

40 capittel

Doe dat gesciet was, doe wort daer geopenbaert dat daer twee van des

[fol. 24va]

conincs dienres gesondicht hadden. Dat een was des conincs scenker ende dat ander was des conincs backer. Ende si worden beide in den kercker geleit onder Josephs bewaringhe. Ende doe si daer een corte wile gelegen hadden, doe droemde hem elc op eenre nacht enen droem. Ende des morgens doe Joseph in den kerker quam ende sach die gevangen aldaer bedroeft sitten, doe vraechde hi hem waerom dat si aldus bedroeft saten. Doe seiden si: "Wi hebben elc enen droem gesien ende wi en weten niet wat hi bediet." Doe seide Joseph: "Vertrect mi uwen droem." Doe vertelde hem die scencker sinen droem ende seide: "Ic sach voir mi enen wijngaert; daeran waren 3 rancken. Si wyesen ende bloeyden ende brochten druven. Ic hadde des conincs nap in die hant ende ic nam die druven ende dudese in den nap ende gaf den coninc drinken." Doe seide Joseph: "Dit is die bedudenis des droems. Die drie rancken beduden drie dagen. Dan sel coninc Pharo uwer gedencken ende setten u weder in uwen dienst daer gi in plaget te wesen. Ende alst wel mit u gaet, so gedenct mijns. Ende bit coninc Pharo dat hi ontfermherticheit over mi toge, want ic stolinghe uut den Ebreeuschen lande vercoft bin. Ende ic bin ontsculdichliken

[fol. 24vb]

in den kercker gebrocht. Daerom gedenct mijns." Doe die backer hoerde dat Joseph dat so wiselic exponeerde, doe seide hi: "Ic sach in minen droem dat ic op mijn hoeft hadde 3 corven mit brode. Ende in den oversten corve daer was alrehande spijs in die die backers backen. Ende daer quamen vogelen ende aten daerof." Doe seide Joseph: "Dit is die bedudenis van dien droem. Die drie corven dat sijn drie dagen. Dan sel coninc Pharo u doen nemen ende hangen an een galge. Ende die vogelen sellen comen eten u vleis." Ende opten dorden dach doe hielt coninc Pharo hoechtijt van sijnre geboerten. In der hoechtijt der worscap so docht coninc Pharo om sinen scenker ende om sinen backer. Ende dat recht wort daerof ondersocht. Die scencker wort wedergeset in sinen dienst ende die backer wort gehangen.