Noordnederlandse Historiebijbel

39 capittel

Joseph wort in Egipten vercoft van die Ysmaliten. Ende coninc Pharo rentemeester, die genoemt was Putifer, die coft hem. Ende hi settede hem te dienen in des conincs hof. Ende God die was mit hem, want waer dat hi die hant an sloech, dat ghinc hem voirspoedelic. Ende Joseph die creech graci voir den coninc ende hi sette hem al sijn huse te regieren. Ende God die gebenedide Egipten overmits Joseph. Ende alle beesten ende vruchten ende alle guet wort daer overvloedich. Ende Joseph en at niet anders van des conincs spijs dan broet. Ende hi was scoen van aensicht, genoechlic an te sien. Ende daerna doe sach die coninghinne op Joseph ende seide: "Slaept bi my." Doe seide Joseph: "Swijcht van dier saken! Siet, mijn here heeft mi bevolen al die saken sijns huus. Ende daer en is niet in, ic en heb daer macht over, dan over u alleen. Hoe soude ic dan dat quaet doen ende sondigen jegen minen heer?" Mer dat wijf en liet niet of, si en geerde altoes geselscap mit Joseph. Mer hi beruspetse altoes ende scude haer. Op een tijt doe hadde Joseph in haer camer wat

[fol. 24rb]

te doen. Ende doe greep die vrouwe Joseph bi den clederen ende seide: "Nu moet gi bi my slapen." Doe liet Joseph sijn cleder vallen ende liep uut der camer.

Ende doe die vrouwe sach dat dat cleet in haer handen bleef, doe riep si haer gesin tot haer ende seide: "Mijn heer heeft desen Ebreeuschen man sijn hof bevolen te bewaren, ende hi comt in mijn camer ende wil my vercraften. Ende doe ic worde ropende, doe liep hi wech ende liet hier sijn mantel bliven." Ende si hielt den mantel, waent haer heer thuusquam. Doe haer here gecomen was, doe seide si tot hem: "Desen Ebreeuschen knecht quam in mijn camer ende woude mi vercraften. Ende doe ic begonde te ropen, doe liep hi wech ende liet hier sijn mantel bliven." Doe dat die heer hoerde, hi geloefde der vrouwen woerden ende hi was seer toornich. Ende hi dede Joseph in een kercker leggen. Ende God die was mit Joseph ende ontfermde sijns ende gaf hem graci, want die bewaerre van der kercker die liet Joseph in den kercker gaen ende beval hem al die gevangen te bewaren. Ende het was mit Joseph altoes voirspoedelic in sinen wercken.