Noordnederlandse Historiebijbel

[fol. 6rb]

Van Noe ende sijn geslacht. 10 capittel

Doe begonde Noe die aerde te bearbeiden ende wort een ackerman, ende vant enen wijngaert ende dranc daerof ende wort droncken, ende ghinc in sijn huus legghen slapen. Ende doe hi hem ommekeerde, doe lach hi mitten lichaem bloet, sodat men sijn scamelheit sach, want men doe noch geen broken en droech. Cam, sijn soen, die sach sinen vader bloet leggen tusscen die been. Hi lachtede daerom ende hielt daer sijn spot mede ende seidet sinen brueders. Doe Sem ende Jafet dat hoerden, doe decten si haer ogen mit haren mantel, omdat si des vaders scamelheit niet sien en souden, ende ghingen daer blindeliken toe ende decten hem. Doe Noe ontwake wort ende hem sijn kinderen dat seiden, doe vermaledide hi Cam ende noemden Canaan. Ende hi seide, dat hi een knecht sijnre bruederen soude wesen ende hem onderdanich wesen. Ende Sem ende Jafet die gebenedide hi, omdatse hem doechde deden.

Scolastica seit: Cam beduut die quade joden, die mit Jhesum spotteden, doe hi droncken gemaect was van voel pinen ende naect hinc an den cruce. Daerom sijn si vermaledijt ende verscoven onder die kerstenen. Mer Sem ende Jafet die waren gebenedijt. Daerof quamen

[fol. 6va]

die guede joden, als Nycodemus ende Joseph van Armathien, die Jhesum decten mit haren clederen ende begrueven hem.

Na der dyluvyen so wan Noe enen soen; die noemde hi Jonitus. Ende Noe die gaf hem dat lant van Etham. Ende Jonitus was die eerste astronomye vant. Ende hi voirseide, dat Cams geslacht eerst soude mogentheit hebben over die werelt. Dat waren die van Babilonien. Daerna soude Sems geslacht die werelt dwingen. Dat waren die van Persen ende van Meden. Daerna soude Jafets geslacht die mogentheit der werelt hebben. Dat waren die Griecken.

Doe Noe out was 900 jaer ende vijftich, doe bleef hi doot.

Josephus seit: Men sel mitten ouden niet spotten, want si hebben die consten gevonden, als astronomye ende geometrie ende ander consten. Ende die die consten van eerst vinden soude, hi most daer 700 jaer om studieren. Daerom hebben die oude die consten gevonden.

Eer Noe starf, so waren op der werelt 24.000 mannen ende 100, behalven wiven ende kinderen. Sem, Cam ende Jafet die hadden 72 kinderen, behalven haer dochteren.