Noordnederlandse Historiebijbel

9 capittel

Doe gebenedide God Noe mit sinen kinderen ende seide: "Wast ende menichvoudicht ende vervolt die aerde. Ende hebt sorghe ende vrese voer al dat levet opter aerden: beesten, dyeren der aerden, vogelen der luchten ende visschen der zee. Al ist onder uwen handen gegeven tot eenre spisen ende gi selt alle vleis eten ende alle cruden die wasschen. Mer eet geen vleis mitten bloede. Ende en doet gheen dootslach, want

[fol. 6ra]

so wie menschenbloet stort, die sel sijn bloet weder gestort worden, want die mens is na den beelde Gods gemaect. Maer gi selt wasscen ende menichvoudigen ende die aerde bewanderen ende vervollen."

Doe God dat tot Noe ende sinen kinderen geseit hadde, doe seide God voirt: "Siet, Ic sette mijn vrede tusschen Mi ende uwen zade ende tusschen al dat mit u leeft: vogelen, beesten, dieren. Al die mit u uter arken gegaen sijn, die geef Ic vrede: dat Icse mitter dyluvyen nymmermeer slaen en sel. Ende dit sel een teyken wesen tusschen Mi ende u ende al dat leeft des vreden tot in der ewicheit: Ic sel mine boge setten in den wolken des hemels tot enen vrede tusschen Mi ende der aerden. Ende Ic en sel alle vleis niet meer mitter dyluvyen doen vergaen, want als Ic mine boge ansie die in der luchten is, so sel Ic den vrede gedencken tusschen Mi ende alle levende sielen die vleis ontfangen hebben opter aerden."

Scolastica seit: Dat witte van den regenboge dat is dat water dat is geleden mitter dyluvyen. Mer dat rode is ons naerre ende dat beteykent vuer daer God die werelt sel mede doen vergaen in den Doemsdage. Ende 40 jaer voir den Doemsdage so sel den regenboech tenietgaen ende men sels dan niet sien.

Al dat daervoir gescreven is, dat gesciede in die eerste etate. Dat is in die eerste outheit ende die stont 2000 jaer, 100 ende 2 jaer.