Nieu jaar liedekens uyt ghegheven by de retorijck kamer t'Aemstelredam In lied' bloeyende
(ca. 1608)–Anoniem Nieu jaar liedekens uyt ghegheven by de retorijck kamer t'Aemstelredam In lied' bloeyende–
AuteursrechtvrijVanden jare vyfthienhondert eenentachtentich tot den jare 1608
[Folio C8r]
| |
Op die wyze: Ick was een clercxken, ick ging ter scholen, oft Het wayt een windeken uyt den oosten.INt nieuwe Iaar men lofsang singhen
Vant kindt dat ons gheboren is
Dat ons bevrijt, en troost comt bringhen
En soeckt dat hier verloren, is.
T'gheluyt des sangs is haest vervloghen
De deught die ruymt uyt s'menschen hert
En t'quaat dat wert weer in ghesoghen,
Waer door op nieuws ghesondicht wert.
Alsmen noch quaat op quaat gaet bouwen
En doen het gheen, dat Godt mishaeckt
Sent hy zijn straf tot ons behouwen,
Met roeden swaer, daer hy mee plaecht.
Als haet en nijt, met twist verwoedich
Ghemengt met bitter gal en roet
Waer uyt dan spruyt een oorloch bloedich
Dat veele brengt om lijff en goet
Deur lang benaude duerre tijen
Van honghers noot veel wert ontzielt
Maar strenghe Pest, vol schrik en lijen,
Dusentmael meer, menschen vernielt.
Die wilmen vlien met angstich duchten
Door vreese van het lieue lijff
En soecken raat om die tontvluchten,
Met ghelt en goet voor kint en wijf.
| |
[Folio C8v]
| |
Is elck een dan so seer sorchvuldich
Voor tgheen het lichaem schenden can
Do veel te meerder zijn wy schuldich
Voor onse ziel te zorghen dan.
Wijf kint, en schat, wert weer vercreghen
Maar d'edel ziel tot gheender tijt
Hierom het swaert dat meest moet weghen
Is boet doen, dat het quaet of snijt.
Boet doen van sond wert hooch ghepresen
Gheloof, en hoop, tot weldoen raet
Maar Liefde moet voor al daer wesch,
Die alle dinck te boven ghaet.
De Liefde is goet, en leyt ten ghoeden
Tot weldoen streckt haer eenich endt
Sy soeckt den straff niet te verhoeden,
Maar tquaet dat ons de plaghen sent.
PRINCE.
Daar Liefde dan int hart mach groeyen
Bedeckt zy alle sonden swaar
Bidden wy Godt dat liefd mach bloeyen
Sy brengt goe vrucht, Int nieuwe Iaar.
Verkiesen doet verliesen, |
|