Nieuwe Testament (Zuidnederlandse vertaling)

IV

Na desen sagic ende siet, die [een] dore was op gedaen in den hemel, ende de ierste stemme, die ic hoerde, was met mi sprekende alse een busine, seggende: Clemt hier [herwert] op, ende ic sal di toenen de welke haestelec gescien moeten na desen. Ende stappans wasic in den geeste ende siet, een sitten was gesettet in den hemel ende een sitten\de

[fol. 239v]

op tsitten, ende die sat, was gelijc van ansichte eens steens jaspidis ende sardonis, ende een regen boge was in den ommeringe des sittens gelijc in den siene enen smaragde ende alommedomme tsitten waren XXIV sittene ende op die throenen XXIV ouderen, sittende omcledet met witten stoelen ende in hare hoevede guldene croenen, ende vanden throen gingen voert blixemen ende stemmen ende dondere. Ende VII lampten berrende voer den throene, dat sijn VII geeste Gods. Ende in den anscouwen des stoels als een gelasene see gelijc cristale ende in midden tsitten ende alomme tsitten IV diere vol ogen vore ende achter. Ende dierste dier gelijc enen leeu ende dander dier gelijc enen calve ende terde dier gelijc hebbende danschijn enen mensce ende tfierde dier gelijc enen vliegenden aer. Ende de IV diere elc harre hadde VI vlogele ende allomme ende binnen sijnse vol ogen ende si en hadden negeene raste dach noch nacht, seggende: Heilech

[fol. 240r]

, heilech, heilech de Here God almechtech, die was ende die es ende die toecomende es. Ende alse die IV diere gaven glorie ende eere ende benedixie den sittenden op den troene, den levenden in de werelt der werelde, so vielen de XXIV ouders voer den sittenden in den troene ende anebeedden den levenden in de werelt der werelde, ende si leiden hare cronen vore den troen Gods, seggende: Du best werdech, Here onse God, te ontfane glorie ende eere ende lof ende doget, want du heves gescepen alle dinc ende omme dinen wille warense ende sijn gheschepen.