ende dier dinge, van dien ic di oppenbaren sal, ende ic sal di bescermen van den volke ende vanden heidenen, daer ic di nu in sende, hare ogen te onttoenne, dat si bekeren vanden donkerheiden ten lichte ende van Sathanas macht te Gode, dat si ontfaen verlanesse harre sonden ende lot onder de heilegen bi den geloeve, dat in mi es. Waer bi, coninc Agrippa, dat ic niet ongeloevech en was der hemelscher visioenne, maer ic boetscaepte ierst den genen, die te Damasco sijn ende te Iherusalem ende in alt conincrike van Judea ende den heidenen, dat si penitencie daden ende dat si te Gode bekeerden, werdege werke van penitencien doende. Uut deser saken, doe ic in den tempel was, so begrepen mi de Joden ende tempteerden mi ende wouden mi dooden. Maer met Gods hulpen so sta ic tot heden in den dage, orcondende den mensten ende den meesten, niet seggende buten dien dingen, de welke de propheten gesproken hebben ende Moyses dat gescien soude: ofte [si passibilis Christus, si primus ex resurrectione mortuorum annuntiaturus est populo et gentibus haec loquente ea et rationem reddente] Christus passilec si, oft hi deerste gheboetscaept werdt licht den volke ende den heidennen uter dooddere verrijssennesse.
Doe dit Pauwels seide ende hi redenne weder gaf,
Auteursrechtelijk beschermd