Nieuwe Testament (Zuidnederlandse vertaling)

XII

Maer te dien selven tide sant Herodes de coninc de hande, op dat hi enege vander kerken soude quellen. Want hi doodde Jacoppe Jans brueder metten swerde. Maer siende, want het den Joden behagede, soe settede hi oec Petere te begripene. Maer het waren de dage vanden derven broden. Den welken, alse hine begrepen hadde, santhine in den kerkere ende leverdenne IV boennaetsen van ridderen te hoedene, willende na den paescen hem ute bringen of leiden den volke. [Dese boennaetsen heeten quaternioene, dat sijn <heren> die elc IV ridderen onder hem <hebben>. Herodes waende Peteren den volke leveren, om dat sine selve doden souden, omdat het so meest hare genoechte was] Ende seker Peter wert gehouden in den kerkere, maer vander kerken gesciede bedinge sonder ophouden tot Gode voer heme. Maer alse hem Herodes ute soude leiden den volke, in dier selver nacht so was Peter slapende tusscen II ridders, gespannen met II ketenen, ende de hueders voer de dore huedden den kerkere. Ende sich, sHeren ingel stont daer bi, ende een licht sceen inder woeningen des ker\

[fol. 197r]

kers, ende hi sloech Peters side ende wecte hem, seggende: Stant op haestelec, ende de ketenen vielen van sinen handen. Maer dingel seide tot hem: Gorde di ende scoye di met dinen cousen. Ende hi dede also. Ende hi seide hem: Doch dijn cleet om di ende volch mi. Ende ute gaende volchde hi hem, ende hi en wiste niet, dat dit waer was, dat dit biden ingel gesciede, maer hi waende een visioen sien. Maer si leden dierste ende dandere hoede ende si quamen ter yserne porten, die ter stat wert leidt, welke hen oec geopent es. Ende si gingen ute ende gingen voert ene strate ende thant ginc dingel van hem. Ende Peter keerde weder te hem selven ende hi seide: Nu wetic waerlec, want mi de Here sinen ingel gesendt heeft, ende heeft mi verloest van Herodes hant ende van alden ontbeidene des volcs vanden Joden. Ende al merkende quam hi te Marien Jans moeder, die getoenaemt es Marchus, daer warenre vele vergadert ende beedden. Maer doe hi voer dwiket vander dore sloech, so ginc een meysen voert met namen Rothe, te hoerne wiet ware. Ende doe si Peters stemme bekinde, van blisscapen en dede si de dore niet op, maer si liep binnen ende boetscaepte, dat Peter vore de dore stont. Ende si seiden tot hare: Du sotst. Maer si seide seker, dat het also ware. Maer si seiden: Het es sijn ingel

[fol. 197v]

. Maer Peter bleef staen cloppende, maer doe si de dore open gedaen hadden, so sagen sine ende worden verwondert. Maer winckende metter hant, dat si swigen souden, vertelde hi, hoe hem de Here geleidt hadde vanden kerkere, ende hi seide: Boetscaept dit Jacoppe [Hi hiet seggen Jacoppe Alpheus sone den besscop van Iherusolima, want dander Jacob was onthoeft. Die Marchus Marien sone, die vore steet, en was Marcus dewangliste niet] ende den brueders. Ende ute gegaen ginc hi wech in een ander stat. Maer doet dach worden was, en was negeen clein stoeringe onder den ridders, wat met Petere gedaen was ocht hoe hi ute gegaen was. Maer alse Herodes hem gesocht hadde ende niet vonden en hadde, soe dede hi ondersuec vanden wachters ende deedse tot hem leiden, ende nedergaende Herodes van Judea in Cesarien ende daer es hi woenende.

Ende hi wert tornech dier van Tyeri ende dier van Sydonen, ende si quamen eenmoedelec tot hem ende bi Plaustus rade, die boven sconincs camere was, so iesscen si peys om dat haer lantscapen van hem gevoedt worden. Maer teenen gesetten dage so cleedde hem Herodes met sinen conincleken clede, ende hi sat ten vonnesse stoele, ende hi riep op hen lieden ende dancte hen weder. Maer tfolc van Tieren riep tot hem: Dit sijn de stemmen gods ende niet eens menscen! Maer stappans sloechene sHeren ingel, om dat hi Go\de

[fol. 198r]

niet eere en gaf, ende hi starf, verteert vanden woermen.

Maer sHeren waert wies ende werdt gemenechfoldecht.

Maer Barnabas ende Pauwels keerden weder van Iherusalem, doe die dienst vervult was, ende si namen Janne met hen, diemen Marchus toenaemt.