Nieuwe Testament (Zuidnederlandse vertaling)

III

Ende Peter ende Jan gingen op te gadere in den tempel ter negender uren te bedene. Ende eenrande man, die cropel was uut siere moeder buc, diemen droech, den welken men dagelecs leide ter porten van den temple, diemen hetet Speciosa, op dat hi almoessene bidden soude vanden genen, die in den tempel gingen,

[fol. 177v]

doe dese sach dat Peter ende Jan begonsten in den tempel te comene, so bat hi om aelmoesene te ontfane. Ende Peter sach op hem met Janne ende seide: Sich op ons. Ende hi sach op hen, hopende dat hi yet van hen ontfaen soude. Ende Peter seide: Selver ende gout en es met mi niet, maer dat ic hebbe, dat gevic di. In den name Ihesu Christi van Nazareth: stant op ende wandele. Ende hi begreeppenne met sijnre rechter hant ende hieffene op, ende thant worden sine beene vergadert ende sine planten. Ende springende stont hi op ende wandelde, ende hi ghinc met hen in den tempel, wandelende ende springende ende Gode lovende. Ende alt volc sachene wandelende ende Gode lovende, ende si bekindenne, dat hijt was, die ter aelmoesenen sat ter specioser porten van den temple, ende si worden vervult met vresen ende wondere in dien dat hem gesciet was.

Maer doe si sagen Petere ende Janne ende heme, die gesont was gemaect, so liep al tfolc te hen van wondere ten portale datmen heet Salomons. Maer Peter siende antwerde hi ten volke: Israelsche manne, wat verwonderdi in dat, ochte wat siedi op ons als ochte wi in onser

[fol. 178r]

cracht ende genedecheiden desen hebben doen wandelen? Abrahams God ende Ysaacs God ende Jacobs God, uwer vadere God, heeft Ihesum, sinen sone, glorificeert, dien gi leveret ende loechenet vore Pylatus ansichte, doe hi vonneste, dat menne soude laten gaen, maer gi loechenet den heilegen ende den gerechtegen ende gi yescht, datmen u geven soude enen manslachtegen man, maer den makere des levens doodetdi, dien God vander doot verwect heeft, wies orconden dat wi sijn. Ende in tgeloeve sijns namen soe heeft hi sinen name vaste gemaect in desen, dien gi siet ende kint, ende tgeloeve, dat bi hem es, heeft desen gegeven volmaecte gesontheit in uwer alre anscouwene. Ende nu, bruedere, so weetic, dat gi dat onwetende hebdt gedaen alsoe uwe princen oec daden. Want God, die voerseit heeft bi al sijnre propheten mont, dat sijn Christus gedoegen soude, hi hevet alsoe voldaen. Hieromme hebdt rouwe ende werdt bekeert, dat u uwe sunden moeten werden verdeluet, op dat als comen selen de tide uwes hermakens van sHeren anscouwene ende hi senden sal Ihesum, dien de hemel ontfaen moet tote in den tide der hermakingen van al dien, dat de Here

[fol. 178v]

gesproken heeft vanden begenne met sijnre heileger propheten monde. Want seker Moyses seide tot onsen vaderen: Want de Here uwe God sal u enen prophete verwecken van uwen bruederen gelijc mi. Hem seldi horen na al dat hi u spreken sal, want het sal wesen, so welke siele dien prophete niet horen en sal, si sal werden verderft van haren volke. Ende alle de propheten, die gesproken hebben van Samuels tide ende daer na, hebben geboetscaept dese dage. Want gi sijt der propheten sonen ende dies testaments, dat God tot onsen vaderen heeft gemaect, seggende tot Abrahamme: In dinen sade selen werden gebenedijt alle familien [of geslechten] der erden. God heeft u lieden ierst sinen sone verwect ende heeftene u gesonden, u te benediene, op dat hem yegewelc bekeren sal van sijnre quader scalcheit.