Nieuwe Testament (Zuidnederlandse vertaling)

IX

Ende vore lidende sach Ihesus enen blenden vander gheboerten. Ende sine jonghe ren vragheden hem: Rabbi, wie hevet ghesondeget, dese ochte sijn vader ende moe\der, dat hi blent gheboren soude werden? Ihesus antwerde: Noch dese en heveghesondeghet noch sijn vader ende

[fol. 212v]

moeder, maer op dat de werke Gods gheoppenbaert werden souden in hem. Mi behoret te werkene sine werke, die mi sendde, tote dat dach es, want de nacht comt, dat nieman werken en mach. Also langhe alse ic in de werelt ben, benic licht der werelt. Alse hi dese gheseghet hadde, spoeu hi in de erde ende maecte modere uter speeculen ende streec de modere op sine oghen ende seide hem: Ganc ende wassche di in natathoria Syloe, dat bediedet: ghesendet. Daeromme ghinc hi ende dwoech ende quam siende. Ende de ghebueren ende die hem tierst saghen want hi was bedelare, seiden: En es dese niet, die sat ende bat? Andere seiden: Want dese eest, andere seiden: Hi en ees niet, maer het es sijn ghelike. Maer hi seide: Want ic beent. Daeromme seiden si hem: Hoe sijn dine oghen ontploken? Hi antwerde: De mensce, die Ihesus gheseghet werdet, maecte modere ende salvede mine oghen ende seide mi: Ganc te natathoriam Syloe ende wassche, ende ic ghinc ende wiesch ende sach. Ende si seiden hem: Waer es hi? Hi seide: Icken weet.

Die blent was, leidden

[fol. 213r]

si ten Phariseeusen. Want het was saterdach, doe Ihesus modere maecte ende sine oghen op dede. Daeromme vraghenden hem de Pharisei anderwerf, hoe hi saghe. Ende hi seide hen: Hi leide mi modere op mine oghen ende ic wiesch ende ic sie. Daeromme seiden selke uten Phariseeusen: Dese mensche en es niet van Gode, die den saterdach niet en hoedet. Andere seiden: Hoe mach een mensche, een sondere, dese tekene ghedoen? Ende sceldinghe was onder hen. Daeromme seiden si den blenden anderwerf: Du, wat seghestu van hem, die di op dede dine oghen? Ende hi seide: Want hi es profete. Daeromme en gheloefden de Joden niet van hem, want hi blent ware gheweset ende saghe, tote datse riepen sinen vader ende moeder, diet ghesien hadden. Ende si vragheden hen segghende: Dit es uwe sone, welken ghi segghet, want hi es blent gheboren? Daeromme hoe siet hi nu? Daeromme antwerden sijn vader ende moeder ende seiden: Wi weten want dit es onse sone ende want hi blent gheboren es

[fol. 213v]

, maer hoe hi nu siet, en wete wi niet noch wie sine oghen op dede en wete wi niet, vraghes hem, hi hevet de outheit, hi sal spreken van hem. Dese seiden sijn vader ende moeder, want si ontsaghen de Joden, want stappans hadden de Joden over een ghedraghen, dat so wie hem beliede Christum, hi soude werden gheworpen uter synagoghen. Daeromme seiden sijn vader ende moeder: Hi hevet de outheit, vraghet hem.

Daeromme riepen si noch de mensche die blent hadde gheweest ende seiden hem: Ghevet Gode glorie, wi weten want dese mensche es een sondare. Daeromme seide hi: Icken weet ochte hi sondare es, ic weet een, want alse ic blent was, nu sie ic. Daeromme seiden si hem: Wat dede hi di? Hoe ontdede hi di dine oghen? Hi antwerde hen: Ic seidt u stappans ende ghi horet. Wat wildijt anderwerf horen? Ende ghi, en wildi sine jongheren niet werden? Daeromme vloectense hem ende spraken: Wes du sijn jonghere, maer wi sijn Moyses jongheren, wi weten want God es Moysen toe sprekende, maer de\sen

[fol. 214r]

en wete wi niet, wanen hi si. Die mensche antwerde ende seide hen: Want in dien eest wonderleke, dat ghi niet en wet, wanen hi si ende hi ontdede mine oghen. Ende wi weten, want de sondaren en horet God niet, maer so wie Gods oefenere es ende sinen wille doet, dien horet hi. Vander werelt en eest niet ghehoret, want ieman ontdede de oghen een blendes gheborens. Het en ware dat dese van Gode ware, hi en mochte niet doen. Si antwerden ende seiden hem: In sonden bestu al gheboren ende du leeres ons? Ende si worpenne ute.

Ende Ihesus hoerde want si hem ute hadden gheworpen, ende alse hine vant, seide hi hem: Du gheloeves in den sone Gods. Die antwerde ende seide: Here, wie eest, op dat ic in hem gheloeve? Ende Ihesus seide hem: Ende ghi saechtene ende die met u sprect, hi eest. Ende hi seide: Ic gheloeve, Here, ende ghinc voert ende anebeedde hem. Ende Ihesus seide: Ic quam in een ordeel in dese werelt, op dat die niet en sien, siende werden ende die sien, blent werden. Ende het horden selke uten Phariseen, die met

[fol. 214v]

hem waren ende seiden hem: Ende wi, en sijn wi niet blent? Ihesus seide hen: Waert dat ghi blent waert, so en haddijs ghene sonde, maer want ghi nu segghet: Want wi sien, so blivet uwe sonde.