Nieuwe Testament (Zuidnederlandse vertaling)

XIII

Maer daer waren selke in dien tide, die hem boedscaepten van den Galileeuschen, der welkere bloet Pylatus mingde met haren offeranden. Ende Ihesus seide hen antwerdende: Waendi, dat die Galileeusche meerre sonderen waren dan alle die van Galilea, omme dat si also ghepassijt sijn? Ic segghe u, neense, en si dat ghi penitencie hebbet, ghi selt alle verderven ghelikeleke. Ende also die XVIII, daer de torre op viel in Syloam ende dodese, waendi dat die sculderen waren vore alle die wandelden in Iherusalem? Neense. Ic segghe u, en si dat ghi penitencie hebbet, ghi selt alle verderven ghelikeleke.

Ende hi seide dese ghelikenesse: Selc hadde enen vigheboem gheplant in sinen wijngaert ende

[fol. 163r]

hi quam soekende vrocht in dien boem, ende hi en vanter niet. Ende hi seide ten wijngardere: Siet, III jaer sijns, dat ic ben comende soekende vrocht in desen vigheboem, ende icken vender niet. Daeromme snittene af! Wat becommert hi oec derde? Ende hi seide hem antwerdende: Here, laettenne noch dit jaer, tote dat ic grave omtrent hem ende legghere mes omme op avonture ochte hi vrocht maecte, ochte snitten af int toecomende jaer.

Ende Ihesus was lerende in hare synagogen tsaterdaghes. Ende siet, een wijf hadde den gheest der siecheit XVIII jaer ende was nederwert ghehelt ende en mochte entwent niet opwert sien. Ende alse Ihesus sach, riep hise te hem ende seide hare: Wijf, du best verlaten van diere siecheit; ende hi leide de hant op hare ende te hant wertsi op gherecht ende lovede Gode. Ende archisynagogus antwerde onwerdeleke, om datse Ihesus op den saterdach gheganst hadde, ende seide ter scaren: VI daghe sijn, daer in behoert te werkene; daeromme comt in dien ende wert gheganst, ende niet in den sater\daghe.

[fol. 163v]

Ende onse Here seide te hem antwerdende: Ypocrite, en ontbendet ieghewelc uwer niet sinen osse ochte sinen esel dies saterdaghes vander crebben ende leidtene te watere? Maer siet, dese Abrahams dochter, die sathanas hadde ghebonden XVIII jaer, en mochtse niet werden ontbonden van desen bande op den saterdach? Ende alse hi dese dinghe gheseghet hadde, scaemden hen sine wedersaken, ende al dat volc vervroudde in alle de welke glorioseleke van hem ghedaen waren.

Daeromme seide hi: Wien es ghelijc dat rike Gods ende wien salict achten ghelijc sijnde? Het es ghelijc enen senpsade, dat een mensche nam ende warpt in sinen hof, ende het wies ende het es ghemaect een groet boem, ende de vogele shemels hebben gherust in sinen telgheren. Ende hi seide anderwerf: Wien salic dat rike Gods ghelijc achten? Het es ghelijc den heve, dien een wijf nam ende barchene in III maten meels tote dat al hevachtech wert.

Ende hi ghinc dore stede ende dore casteele lerende, ende hi maecte sinen wech in Iherusalem. Ende doe sei\de

[fol. 164r]

een te hem: Here, salre lettel behouden werden? Ende Ihesus seide te hen: Pijnt u in te gane dore de inghe porte, want ic segghe u, vele selen daer soeken in te gane ende si en selen moghen. Want alse de vader der familien sal sijn in ghegaen ende sal de dore hebben gheloken, so seldi beghennen te stane buten ende te cloppene vore de dore ende segghen: Here, doet ons op, ende hi sal u segghen antwerdende: Icken weet niet, wanen ghi sijt. Dan seldi begennen te segghenne: Wi aten ende dronken vore di ende du leres in onsen straten. Ende hi sal u segghen: Icken weet niet, wanen ghi sijt, gaet van mi, alle wercliede der quaetheit, daer weeninghe sal sijn ende ghecrisel der tande, alse ghi selt sien Abrahamme, Ysaacke, Jacoppe ende alle de profeten in Gods rike, ende selt werden ute ghesteken. Ende si selen comen van oest ende van west, van suut ende van noert, ende selen rusten int rike Gods. Ende siet, si sijn de leste.

In dien daghe quamen selke der Pharisei ende seiden hem: Gaet ute ende gaet van hier, want Herodes wilti do\den.

[fol. 164v]

Ende Ihesus seide hen: Gaet ende segghet dien vos: Siet, ic werpe ute de duvele ende ic volmake die ghesontheit heden ende morghen, ende ten derden daghe werdic verteert. Nochtan behoert mi heden ende morghen ende den dach daer na te wandelenne bidi, want en sal gheen profete verderven buten Iherusalem. Iherusalem, Iherusalem, die verslees die profeten ende steins die ghesendt werden te di, hoe dicke ic wille vergaderen dine kindere alse een voghel sinen nest onder sine plumen, du en wils. Siet, u huus sal u werden ghelaten woeste. Ende ic segghe u: Ghi en selt mi niet sien, tote dat comt dat ghi selt segghen: Ghebenedijt si die comt in den name ons Heren!