|
| |
Hier es ute Marcus ewangelie, ende hier volghet sente Lucas ewangelie dierste capitel
I
Inden daghen Herodes, dies conincs van Judea, was erehande priestere, met namen Zacharias, van der behoerten Abyas, ende sijn wijf was van den dochteren Aarons ende hare name was Elizabeth. Ende si waren beide gherecht, wandelende in alle de ghebode ende de gherechtecheide ons Heren, sonder claghen. Ende hen en was negheen sone, omme dat Elizabeth ondrechtech was, ende si waren beide overghegaen in haren daghen.
Ende het es ghesciet, alse Zacharias was ghewijt te priesterscape in der ordinancien siere behoerten, ghinc hi ute met lote, na de ghewoente dies priesterscaeps, op dat hi inghegaen in den tempel ons
| |
| |
Heren wieroec soude setten vore Gode. Ende al de menechte dies volcs was buten beidende ter uren dies wieroecs. Ende de inghel ons Heren oppenbaerde hem, staende ter rechter hant dies outaers dies wieroecs. Ende Zacharias es gheturbeert, hem siende, ende vrese viel op hem. Ende de inghel seide hem: En onsich di niet, Zacharia, want dine bedinghe es ghehoert ende Elizabeth, dijn wijf, sal di baren enen sone ende sijn name sal werden gheheeten Jan. Ende di sal sijn bliscap ende vroudde ende vele selen verbliden in siere gheboerten. Want hi sal groet sijn vore den Here, ende wijn ende syceram en salhi niet drinken, ende hi sal werden vervult vanden heilegen gheeste noch in den lichame siere moeder, ende der kindere van Israhel sal hi vele bekeren ten Here, haren God. Ende hi sal vore gaen vore hem inden gheeste ende inde viertuut Helye, op dat hi bekere de herten der vadere in de sonen ende de ongheloeveghe ter vroetheit der gherechtere, te ghereidene den Here een volmact volc.
| |
| |
Ende Zacharias seide ten inghel: Waer af salic dat weten? Want ic ben out ende mijn wijf es overghegaen in haren daghen. Ende de ingel seide hem antwerdende: Want ic Gabriel ben, die daer sta vore Gode ende ghesendet ben te di, dese dinc te sprekene ende te ewangelizeerne. Ende sich, om dattu niet en gheloeves minen woerden, die in haren tide selen werden vervult, so saltu sijn swighende ende en sels niet moghen spreken tote in den daghe dat dese gheschien selen. Ende dat volc was Zacharias beidende ende si verwonderden, dat hi merde inden tempel. Ende uteghegaen en mochte hi te hen niet spreken, ende si bekinden, dat hi een visioen hadde ghesien in den tempel. Ende hi was hen tekenende ende vol bleef stom. Ende het es ghesciet, alse de daghe sijns ambachts ochte dienst vervult sijn, ghinc hi in sijn huus.
Ende na desen dagen ontfinc Elizabeth sijn wijf ende barch hare V maende, segghende: Want aldus hevet mi de Here ghemaect in den daghen, in welken
| |
| |
hi ansach af te nemene minen lachter onder de menschen.
Ende in de seste maent es gesendet de inghel Gabriel van Gode in ene stat van Galilea, welker name was Nazareth, te ere maghet, die ondertrouwet was enen man, wies name was Joseph, vanden huse Davids, ende der maghet name was Maria. Ende inghegaen de inghel seide hi te hare: Ave, volle gracie, de Here met di, du ghebenedide in den wiven! De welke alse si hoerde, esse gheturberet in siere redenen ende si peisde, hoe ghedaen dese groete ware. Ende de inghel seide hare: Du en sels di niet ontsien, Maria, want du hebs gracie vonden bi Gode. Sich, du sels ontfaen in den lichame ende sels baren enen sone, ende sels sinen name heten Ihesum. Dese sal groet sijn ende hi sal werden gheheten de sone dies alrehoechstes, ende God de Here sal hem gheven Davids sitten sijns vader, ende hi sal regneren in den huse Jacobs inder ewecheit, ende sijns rijcs en sal gheen inde sijn.
| |
| |
Ende Maria seide ten inghel: Hoe sal dit gheschien, want icken bekinne neghenen man? Ende de inghel seide hare antwerdende: De heileghe gheest sal boven comen in di ende de viertuut dies alre hoechstes sal di omme scaduwen; ende daeromme, dat ute di sal werden gheboren, sal werden gheheten heilech ende de sone Gods. Ende siet, Elizabeth, dine nichte, ende si hevet ontfaen enen sone in harre outheit ende dit es hare seste maent, die daer hetet ondrechtech. Want elc waert en sal niet sijn onmoghelec vore Gode. Ende Maria seide: Siet de dierne ons Heren, mi gheschie na dinen woerde. Ende de inghel voer wech van hare.
Ende opstaende Maria in dien daghen ghincse met haestecheiden in dat gheberchte in de stat Jude. Ende si ghinc in Zacharias huus ende gruette Elizabeth. Ende het es ghesciet, alse Elizabeth horede de gruetinghe Marien, vervroudde dat kint in haren lichame, ende Elizabeth es vervult van den heileghen gheest. Ende si riep ute met groter
| |
| |
stemmen ende seide: Du ghebenedide onder de wive ende de vrocht dijns lichamen ghebenedijt. Ende wanen comt mi dat, dat de moeder mijns Heren te mi comt? Want siet, alse ghemaect es de stemme dijnre gruetinghe in minen oeren, vervroudde dat kint in bliscapen in minen lichame. Ende ghebenedide die gheloevet, want die dinghe die di gheseghet sijn vanden Here, selen werden voldaen. Ende Maria seide: Mine siele maect groet den Here, ende mijn gheest vervrouddet in Gode, miere salecheit, want hi hevet aneghesien de oetmoedecheit siere diernen. Want siet, van dien selen mi salech segghen alle gheboerten, want hi hevet mi grote dinghe ghedaen, die moghende es, ende sijn name heilech, ende sine ontfermecheit van gheslechten in gheslechten dien, die hem ontsien. Hi hevet mechtecheit ghedaen in sinen arme, hi spraeyde de hoeverdeghe vander ghedachten harre herten, de mechteghe sette hi af van den sittene ende hi verhoeghede de oetmoedeghe, de hon\ghereghe
| |
| |
vervulde hi met goeden ende de rike liet hi in ydelheide. Hi ontfinc Israhel, sijn kint, hi herdachte siere ontfaermecheit, alsoe hi sprekende es te onsen vaderen, Abraham ende sinen sade in de werelde.
Ende Maria bleef met hare alse III maende ende es weder ghekeret in hare huus.
Ende de tijt der baringhen Elizabeth es vervult ende si baerde enen sone. Ende de ghebueren ende hare maghe hoerden dat want de Here groet ghemaect hadde sine ontfaermhertecheit met hare, ende si verblijdden met hare.
Ende het es gheschiet in den achtenden daghe quamense dat kint te besnidene, ende si hietenne Zacharias na den name sijns vader. Ende sijn moeder seide antwerdende: Neen niet, maer hi sal heeten Jan. Ende si seiden: Want niemen en es in dijnre maechscap, die met dien name hetet. Ende si tekende sinen vader, hoe hi woude, dat hi worde gheheten. Ende eyschende pusillarem, screef hi segghende: Jan es sijn name. Ende si sijn alle verwondert. Ende sijn mont es ontploken ilico ende sine tonghe, ende hi sprac, Gode ghebenediende.
Ende bo\ven
| |
| |
alle sine ghebueren es vrese ghemaect, ende boven alle dat gheberchte van Judee worden alle dese waerde ghemeinlect. Ende alle diese ghehoret hadden, settense in hare herte, segghende: Wie sal dit kint sijn, waendi? Want de hant Gods was met hem.
Ende Zacharias sijn vader es vervult van den heileghen gheeste ende hi propheteerde, segghende: Ghebenedijt si God, de Here van Israhel, want hi hevet ghevisiteert ende verloessinghe ghemaect sijns volcs, ende hi hevet ons ute gherect den horen der salecheit inden huse David, sijns kinds, alsoe hi sprekende es dore den mont der heilegen siere propheten, die vander werelt sijn, salecheit van onsen vianden ende vander hant alle diere, die ons haetten, te doene ontfaermecheit met onsen vaderen ende te ghedinkene sijns heilechs testaments, dat ghesworene recht, dat hi swoer te Abraham, onsen vader, hem ons te ghevene, op dat wi hem dienen sonder vrese, ghevrijt van der hant onser viande in hei\lecheiden
| |
| |
ende gherechtecheiden vore hem, alle onse daghe. Ende du, kint, sels heten prophete dies alre hoechstes, want du sels voregaen vore dat anschijn dies Heren, te bereidenne sine weghe, te ghevene cunst der salecheit sinen volke in verlatenessen harre sonden, overmids de binnenste der ontfaermhertecheit ons Gods, inden welken hi ons visiteerde opgaende uten hoghen, te verlichtenne dese, die in den demsternessen ende in de scaduwe der doot sitten, te rechtene onse voete in den wech dies vreds.
Ende dat kint wies ende wart ghesterct van den gheeste, ende was in den woestinen tote in den daghe siere toeninghen in Israhel.
|
|
Auteursrechtelijk beschermd