|
| |
XXV
Dan es dat rike der hemele ghelijc X magheden, die uteghinghen, nemende hare lampten, te ontmoete den brudeghoem ende der bruut. Ende de V ute hen waren sot ende de V vroet. Maer de V sotte, ghenomen hare lampten, en namense ghene olye met hen, maer de vroede namen olye in haren vaten metten lampten. Ende merringhe makende de brudegoem warense alle slapachtech ende si sliepen. Ende in midden der nacht es een gheroep gemaect: Siet, de brudegoem comt, gaet ute, hem
| |
| |
te ontmoete! Doe stonden op alle die maghede ende cierden hare lampten. Ende de sotten seiden den wisen: Ghevet ons van uwer olyen, want onse lampten werden gheblusschet. De vroede antwerden segghende: Op datse bi avonturen niet ghenoech en waren ons ende u, gadi bat ten vercoependen ende coepter u. Ende alse si gaen souden copen, quam de brudegoem, ende die bereet waren, ghinghen in met hem ter brulocht, ende de dore es ghesloten. Ende techterst quamen de andere maghede, segghende: Here, here, doet ons op! Ende hi seide antwerdende: Amen segghic u: Icken kinne u niet. Ende alsoe waect, want ghi en wet den dach noch de ure.
Want alsoe een mensche, in pelgrimagen varende, sine knechte riep ende leverde hen sine goede ende gaf den enen V talenta ende den anderen II, maer den anderen enen, maer elken na sine propere viertuut, ende es stappans wech ghevaren. Ende die V talenta ontfaen hadde, ghinc ende es in hen werkende ende es wennende V andere. Ende die de
| |
| |
II ontfaen hadde, es ghelikeleke wennende II andere. Ende die enen ontfaen hadde, wech gaende groefhine in de erde ende barch sijns heren ghelt. Maer na vele tijts quam de here diere knechte ende sette redene met hen. Ende comende die V talenta ontfaen hadde, brachte hi V andere talenta, segghende: Here, ghi leveret mi V talenta, siet, ic ben V andere boven wennende. Sijn here seide hem: Euge, goet knecht ende ghetrouwe, want du boven lettelen ghetrouwe waers, salic di setten boven vele, ganc in in de blisscap dijns heren. Ende die II talenta ontfaen hadde, quam ende seide: Here, ghi leveret mi II talenta, siet, ic ben II andere boven wennende. Sijn here seide hem: Euge, goet knecht ende ghetrouwe, want du boven lettelen ghetrouwe waers, salic di setten boven vele, ganc in in de blisscap dijns heren. Ende comende die enen talentum ontfaen hadde ende hi seide: Here, ic weet, want du best een hart mensche, ghi oech\stet
| |
| |
daer ghi niet ghesaeyt en hebdt ende gadert daer ghi niet ghespreydt en hebdt, ende ontsiende ghinc ic ende barch dinen talentum in de erde, siet, du heves dat dine es. Ende sijn here seide hem antwerdende: Quaet knecht ende traghe, du wistes, want ic oechste daer ic niet en saeye ende gadere daer ic niet en spreidde. Daeromme moestu mijn ghelt hebben gheleghet ter wisseleers ende comende soudic weder nemen dat mine es oec metter persemen. Ende alsoe doet wech van hem den talentum ende gheeftene hem, die X talenta hevet. Want elken hebbenden sal werden ghegheven ende hi sal overvloyen. Ende hem, die niet en hevet, dat hi ghesien wert hebbende, wert af ghenomen van hem. Ende den onorboerleken knecht werpt ute ende senttene in de echterste donkernesse, daer weeninghe sal sijn ende ghecrisel der tande.
Ende alse smenschen sone comen sal in siere moghentheit ende alle sine inghele met hem, dan sal hi sitten op den stoel siere mogent\heit.
| |
| |
Ende vore hem selen vergadert werden alle menschen, ende hi salse scheden van onder een alsoe de herde utegadert de scape vanden hoekenen, ende seker hi sal de scape setten te siere rechter hant ende de huekene ter slinkere. Dan sal de coninc segghen dien, die van siere rechtere selen sijn: Comt, ghebenedide mijns vader, besittet rike, dat u bereet es vander settinghen der werelt. Want ic hadde hongher ende ghi gavet mi tetene, mi dorste ende ghi gavet mi te drinkene. Ic was gast ende ghi herberghet mi, naect ende ghi decket mi, siec ende ghi visenteret mi, ic was in den kerkere ende ghi quaemt te mi. Dan selen hem antwerden de gherechte, segghende: Here, wanneer saghe wi di hongherech ende spisden di, dorstech ende gaven di drinken? Ende wanneer saghe wi di gast ende herbergheden di, ochte naect ende decten di? Ochte wanneer saghe wi di siec ochte in den kerkere ende quamen te di? Ende hi sal hen segghen antwerdende: Amen segghic u, alsoe
| |
| |
langhe alse ghijt enen daedt ute desen minen mensten bruederen, daeddijt mi. Ende dan sal de coninc segghen dien, die van siere slinkere selen sijn: Gaet wech van mi, vermaledide, int eweghe vier, dat bereet es den duvel ende sinen inghelen. Want ic hadde hongher ende ghi en gavet mi niet tetene, ic hadde dorst ende ghi en gavet mi niet te drinkene, ic was gast ende ghi en herberghet mi niet, naect ende ghi en decket mi niet, siec ende in den kerkere ende gi en visiteret mi niet. Ende dan selense hem antwerden, segghende: Here, wanneer saghe wi di hongherech ochte dorstech ochte gast ochte naect ochte siec ochte in den kerkere ende en dienden di niet? Dan sal hi hen antwerden, segghende: Amen segghic u, alsoe langhe alse ghijs niet en daedt enen van desen menderen, soe en daeddijs mi oec niet. Ende dese selen gaen in de eweghe pine ende de gherechte in deweghe leven.
|
|
Auteursrechtelijk beschermd