Nieuwe Testament (Zuidnederlandse vertaling)

XXIII

Dan es Ihesus sprekende ten scaren ende te sinen jongheren, segghende: Op Moyses setel saten scriben ende Pharisei. Daeromme alle de welke si u sei\den,

[fol. 67r]

houdet ende doet, maer na hare werke en wilt niet doen, want si segghen, ende en doens niet. Want si benden sware bordenen ende ondrachleke ende legghense op de scouderen der menschen, ende si en willense niet roeren met haren vinghere. Daeromme doense alle hare werke, op datse werden ghesien vanden menschen. Si breiden hare brieve der ghebode ende si groeten hare frengien, want si minnen de ierste sittene in de etentide ende de ierste setele inden synagoghen, ende de grueten in de marc ende gheheten te sine vanden menschen rabi. Ende en wilt ghi niet gheheten werden rabi, want uwe meester es een ende ghi sijt alle gebruedere. Ende en wilt u ghenen vader noemen op der erden, want een es uwe vader, die in den hemele es. Noch ghi en selt heten meestere, want een es uwe meester, Christus. Die meerre es onder u, hi sal uwe dienare sijn.

Ende die hem verhoeghet, hi sal gheoetmoedecht werden, ende die hem oetmoedecht, hi sal verhaven werden.

Ende wee u, scriben ende Pharisei, ypocri\ten,

[fol. 67v]

die slutet dat rike der hemele vore de menschen. Want ghi en gater niet in, noch ghi en laetter de ingaende niet ingaen.

Wee u, scriben ende Pharisei, ypocriten, die de huse der weduwen etet, in langher bedinghen bedende. Daeromme seldi vor wertmeer dat oerdeel ontfaen.

Wee u, scriben ende Pharisei, ypocriten, die ommegaet de see ende de droechte, op dat ghi maket enen proselitum, ende alse hi ghemaect ware, so maectine sone dies hilsche viers, twevoldegher dan ghi.

Wee u, blende leideren, die segget: So wie sweret bi den temple Gods, het es niet, ende die sweret in dat gout dies tempels, hi es sculdech. Sotte ende blende, want wat es meerre, dat gout ochte den tempel die dat gout heilecht? Ende so wie sweret in den outere, het es niet, ende soe wie sweret in de gave, die daer op es, hi es sculdech. Blende, want wat es meerre, de gichte ochte de outere, die de ghichte heilecht? Daeromme die sweret in den ou\tere,

[fol. 68r]

hi sweret in hem ende in allen die daer op sijn. Ende die sweret in den tempel, hi sweret in hem ende in hem, die in den tempel woent. Ende die sweret in den hemel, hi sweret in den throen Gods ende in hem, die op hem sittet.

Wee u, scriben ende Pharisei, ypocriten, die vertiendet munte ende anijs ende comijn ende ghi hebbet achter ghelaten de welke swaerre sijn der wet: dat ordeel ende ontfaermhertecheit ende dat gheloeve. Ende dese moestemen doen ende die niet achter laten. Blende leideren, ute oefenende de vlieghe ende den kemel verslendende.

Wee u, scriben ende Pharisei, ypocriten, want ghi suvert dat van buten es dies kelcts ende parapsidis, ende binnen sidi vol van rove ende van onsuverheiden. Blende Pharisee, suvere tierst dat binnen es dies kelcts ende parapsidis, op dat suver werde dat, dat van buten es.

Wee u, scriben ende Pharisei, ypocriten, die ghelijc sijt den ghewitten graven, die van buten den menschen scone oppenbaren, maer binnen sijnse vol bene der dodere ende alre

[fol. 68v]

onsuverheit. Seker ende aldus oppenbaerdi den menschen gherecht van buten ende binnen sidi vol ypocrisien ende quaetheiden.

Wee u, scriben ende Pharisei, ypocriten, die de grave der propheten stichtet ende cieret de grave der gherechter ende segghet: Ware wi gheweest in den daghen onser vadere, wi en waren hare ghesellen niet gheweest in den bloede der propheten. Ende alsoe sidi u selven in ghetughe, want ghi hare sonen sijt, die de propheten doodden, ende ghi vervult de mate uwer vadere. Serpente, gheslechte der slanghen, hoe seldi ghevlien vanden oerdeele dies helsche viers? Daeromme, siet, ic sende te u propheten ende wise ende scriben. Ende selke ute hen seldi doden ende crucen ende selke ute hen seldi gheeselen in uwen synagogen ende persequeren vander stat in de stat, op dat op u come al dat gherechte bloet, dat ute ghestortet es op der erden, vanden bloede Abel, dies gherechtes, toten bloede Zacharie, den sone Barachie, dien ghi

[fol. 69r]

dodet tusschen den tempel ende den outere. Amen segghic u: Alle dese selen comen op dese geboerte.

Iherusalem, Iherusalem, die dodet de propheten ende steint die, die te di sijn ghesendet, hoe dicke woudic vergaderen dine sonen, alsoe de hinne hare kiekene vergadert onder de vloghele, ende du en wouds. Siet, u huus sal u werden ghelaten woeste. Want ic segge u, ghi en selt mi niet sien van nu, tote dat gi segghen selt: Ghebenedijt si die comt in den name dies Heren.