Nieuwe Testament (Zuidnederlandse vertaling)

II

Daeromme alse Ihesus gheboren was in Bethleem Jude in den daghen Herodes dies conincs, siet, magi quamen van orienten te Iherusalem, segghende: Waer es die gheboren es coninc der Joden? Want wi saghen sine sterre in orienten ende wi comen hem anebeden. Ende dat horende de coninc Herodes, es hi gheturbeert ende al Iherusalem met hem, ende vergaderende alle de princen der priesteren ende de scriben dies volcs, ondervant hi van hen, waer Christus soude werden gheboren. Ende die seiden hem: In Bethleem Jude, want aldus es ghescreven overmids den pro\phete:

[fol. 20v]

Ende du Bethleem lant van Juda, du en best niet de menste in den princen van Juda; want ute di sal ute gaen een hertoge, die regeren sal mijn volc Israhel. Doe heimeleke gheroepen de magi leerde Herodes nerenstelec den tijt der sterren van hen die hen oppenbaerde, ende hen senddende in Bethleem, seide hi: Gaet ende vraghet nerensteleke vanden kinde: ende alse ghijt vonden hebdt, herboetscapet mi, op dat ic comende hem anebede. Alse die ghehoret hadden den coninc ghinghen si wech. Ende siet, de sterre die si saghen in orienten voreghincse, tote datse comende staen soude boven daer dat kint was. Ende siende de sterre sijn si verblijdt met herde groeter vrouden. Ende ingaende dat huus vonden si dat kint met Marien siere moeder ende si anebeedden hem nedervallende. Ende op ghedaen hare scatte droeghen si hem ghichten: gout, wieroec ende myrre. Ende antwerde ontfaen inden slape datse niet wedergaen en souden te Heroden, sijnse wederghekeret dore enen anderen wech in hare conincrike.

Alse die wech ghegaen waren, siet, de inghel ons Heren oppenbaerde Joseph in den slape, segghende: Staet op ende nemet kint ende siene moeder, ende vliet in Egypten ende sijt daer tote dat ict u

[fol. 21r]

segghen sal, want het es toetecomene dat Herodes soeken sal tkint hem te verliesene. Die opstaende nam tkint ende siere moeder met nachte ende ghinc wech in Egypten, ende was daer toten stervene Herodes, op dat vervult worde dat gheseghet es vanden Here dore den prophete, segghende: Ute Egypten riepic minen sone.

Dan siende Herodes want hi bescerent was vanden meesteren, es hi herde sere vererret ende sendende doodde hi alle de kindere die in Bethleem waren ende in al sinen inden, van tween jaren ende daer beneden na den tijt dien hi ondersocht hadde vanden meesteren. Dan es vervult dat gheseget es overmids Yeremiam den prophete seggende: In Rama es gehoret de stemme van weeninghen ende van vele ulinghen: Rachel beweenende hare sonen, ende sine woude niet getroest werden, want si niet en sijn.

Ende Herodes gestorven, siet, de inghel dies Heren oppenbaerde Joseph in Egypten in den slape, seggende: Stant op ende nemet kint ende siere moeder ende ganc int lant van Israhel, want die de siele des kinds sochten sijn ghestorven. Die opstaende

[fol. 21v]

nam tkint ende siere moeder ende quam in dlant van Israhel. Ende horende dat Archelaus regneren soude in Judea vore Herodesse sinen vader, onsach hi hem van hem daer te gane; ende ghemaent in den slape ghinc hi wech in de deele van Galylea. Ende comende woende hi in de stat die Nazareth hetet, op dat vervult soude werden dat gheseghet es over mids de propheten: Want hi sal heten Nazareus.