Nieu groot Amstelredams liedt-boeck
(1605)–Anoniem Nieu groot Amstelredams liedt-boeck–
AuteursrechtvrijInhoudende Alderhande Tafel, May, ende andere Amoureuse Liedekens seer vermaeckelijck voor alle Ionge Lieden
Stemme, Alst beghint.Wilt in u Jeucht verblyen,
Nu en tot allen tijen,
Aen alle sijen,
Ghy die hier zyt vergaert
Wilt by u Liefken vlyen,
| |
[pagina 174]
| |
Ist datmen u benijen,
Laet druck van u glijen,
En weest doch goet van aert,
Ick bid u Lief vermaert
Dat ghy my ontdeckt,
Dat ghy my eens verclaert
Of ghy met my geckt,
Soo mach ick u beminnen,
Oft gaen setten uyt mijn sinnen,
Laet my eens troost gewinnen,
Soo is mijn hart van binnen
Altijt in liefde correckt.
Schoon Lief uyt charitaten
Comt my nu te baten,
wilt doch aenvaten,
Verstaet die woorden mijn,
Ick loop steets by der straten
Om eens met u te praten,
Peynst hoe dat wy saten
Met blyden schijn,
Ick ben in Venus lijn
Soo vast ghevaen,
Troost my eer ick verdwijn,
wat macht u schaen?
Troost my in corter ueren,
Oft die doot sal ick besueren,
Mijn hart dat wil my scheuren,
Mocht sy my eens ghebeuren,
Mijn treuren waer al ghedaen.
Die bloem van alle Vrouwen,
Die ick ginck betrouwen,
Sy gaet my onthouwen
Haer lieflijck aenschijn claer,
Sy gaet my van haer douwen,
dus leyt mijn hart in rouwen,
die wech gaet sy my schouwen,
dat sie ick nu voorwaer
Ick siese loopen daer
Bedrijven vreucht
haer liefd’ bewijsts’ een aer, met alle deucht
| |
[pagina 175]
| |
Wand sy my eens troost gheven
die mijn harteken houdt in sneven
Och hoe vrolijck soud ick leven
[Al met die] bloem verheven
[Al in myn] jonghe Ieucht.
Ghy Pyraten al ghelijcken
den armen met den rijcken,
Wilt met gheen practijcken
V Liefken [comen by]
Gaet vry met haer strijcken
Maer [wiltse niet] beswijcken
Laet trouw aen haer blijcken:
Sy is so goet als ghy. Weest vrolijck ende bly
Tot alle tijt,
Schout alle vileyney
Met haet ende nijt,
Comt laet ons vreucht oorboren
Gelijc wy deen te [voren], nae geen ander sporen,
End’ alle druck versmoren,
En leven met jolijt.
|
|