Nieu groot Amstelredams liedt-boeck

Inhoudende Alderhande Tafel, May, ende andere Amoureuse Liedekens seer vermaeckelijck voor alle Ionge Lieden

[Comt Scholieren, Venus dieren]

Op de wijse: Meester Brod die is gheseten.

Comt Scholieren, Venus dieren
die van myn ghenoten zyt,
Vreucht hanteeren // domineeren,
wilt met my op desen tijt
Helpt ongheneucht neder staken,
En wilt met my vreuchde maken,
Laet alle solaes opstaen,
Troost van lief heb ick ontfaen.

Speelt op Luyten // end’ op Fluyten // en verheucht u al gelijc,

wilt uytspruyten, ende uyten sterct geneucht en vreuchde rijc,
Comt ghy lustighe Fiolen,
Ick roep tot mijner Scholen,
Doet doch al nae myn vermaen,
Troost van Lief heb ick ontfaen.

Comt musijckers // Rethorijckers,

Singt ons wat met vreuchden soet,
Ghy practijckers // fantasijckers,
Comt en hebt al goeden moet,
wilt ons alle geneucht voortbringhen,

[p. 164]

 

Speelt oft wilt lustelijck singhen,

 

Houdt nu alle mee my aen,

 

Troost van Lief heb ick ontfaen.

 

Int gemeene, groot en cleene, maeckt u al by my gepaert,

 

Comt bye ene // sterck certeene, vreucht gheneucht na uwen aert

 

Comt hier by ghy Iongh-ghesellen

 

En wilt u voortaen niet quellen,

 

Doet also ick heb ghedaen,

 

Troost van Lief heb ick ontfaen.