Nieu groot Amstelredams liedt-boeck


[Lief u aenschijn, u blyen en vrolijc wesen]
Op de wijse: Ick seg Adieu. Lief u aenschijn, u blyen en vrolijc wesen can shertsen pijn, lustich alleen genesen Daerom sal ick eewich voorwaer Trouwelijck zijn voort u dienaer Ionck vrou eerbaer, aenschout my maer Met u ghesicht ghepresen. Eerlijc beloont, reyn bloen u dienaer trouwe nu ghy betoont hart sinnen moet joncvrouwe Tot u ghestreckt te zijn alleyn In eeren kroont zijn liefde reyn, Maeckt lieflijck greyn t’groot lijden kleyn Verdrijft zijn smart en rouwe. met woorden soet, zijn pijn soect te versachten Zijn lyden boet, laet hen niet langer wachten Ontfangt hem met een fier ghelaet, Die alleyn leeft op u ghenaet, Hem nu bystaet, eert valt te laet, Laet hem niet veel versmachten. Al zijt ghy schoon, en wijs lief boven maten Een slecht persoon en wilt daerom niet baten Maer schickt u vry by hem wat dicht In eerbaerheyt hoort myn bericht Met u ghesicht zijn hart verlicht En wilt hem dus niet laten. Princes eerbaer doet ws dienaers begeren Zijn lyden swaer sal haestelijck verkeeren So ghy en hy zijt eens ghesint Met hem u in de echt verbint Met raet van vrient hy die u mint Sal u altijt vereeren.