Nieu groot Amstelredams liedt-boeck

Inhoudende Alderhande Tafel, May, ende andere Amoureuse Liedekens seer vermaeckelijck voor alle Ionge Lieden

[Soet is den naem]

Stemme: Den tijdt is hier, etc.

Soet is den naem
Van myn liefken ghepresen
Seer net bequaem
Zijn haer manierkens jent,

[p. 142]

 

Vry sonder blaem, seer gratieus int wesen

 

Eerlijck van faem, wort sy in deucht bekent

 

Deur haer liefde eersaem

 

Staet sy int hart gheprent

 

Deur haer soete faconde // vry

 

T’lachen van haren monde // bly,

 

Cupidoos stralen deur wonde // my,

 

Met liefden pertinent.

 

Oochskens voorwaer

 

Heeft sy schoon int aenschouwen

 

Blinckende claer, als een puer diamant,

 

Dus acht ick haer

 

weerder dan andere vrouwen

 

Want gantsch eenpaer, is sy in als playsant

 

En geheel sonder maer, is haren ganck triumphant

 

Om deuchtsame zeden // fijn

 

Die vol courtoise reden zijn

 

Heb ick dickmael gheleden // pijn

 

Al door der minnen brandt

 

En haer deucht die sy daer draecht van binnen

 

My meer verheucht

 

Van tgeen ic heb verclaert, want vol geneucht

 

Is al haer hart en sinnen

 

Mijn geest vervreucht, als ic my vind’ ghepaert

 

Met dese suyvere jeucht, wiens lof ic maer vermaert

 

Dus sal ick t’allen tijden, schier

 

Deur lyden, my verblyden // fier,

 

Om haer schoonheyt en lyden hier

 

Als haer dienaer onbewaert.

 

Thoont doch ootmoet princesse lief verheven

 

Met een ooch goet, uwen dienaer siet aen,

 

Tot eenen groet,wilt hem uwen troost geven

 

So sult ghy soet, u naem te recht ontfaen,

 

Wilt dit doch wesen vroet

 

En u minnaer bystaen,

 

Met u seer goede graey pleyn

 

Gheeft hem door confortary // cleyn

 

So sal lief u laudary // reyn

 

In wellust niet vergaen.

FINIS.