Nieu groot Amstelredams liedt-boeck

Inhoudende Alderhande Tafel, May, ende andere Amoureuse Liedekens seer vermaeckelijck voor alle Ionge Lieden

[Laestmael met so blyden sinnen]

Stemme: Lombre demy.

Laestmael met so blyden sinnen
Quam ick door dat groene wout,
daer vant ic Venus die Goddinne,
Met haer gheselschap menichfout
Elck bracht daer vreuchde voort
En song hen met soet accoort
Comt ghy ghesellekens koene
Speelt met u schoon lief int groene
Maeckt jolijt, tot nijders spijt
Op deser tijdt, wie u benijdt.

Pallas en Diana schoone

Saten daer mede in dit rosier
Cupido sat al in die throone,
Iupiter was daer t’hoochste bestier
Doen sanck daer een basuyne claer,
En dat was ymmers waer,
Coemt ghy ghesellekens koene
Speelt met u schoon lief int groene
Maeckt jolijt tot elcker spijt
Op deser tijdt, wie u benijdt.

Doen ginck Venus onverholen

Lustich op hanghen eenen crans
Ghemaeckt van roosen en phiolen
Daer vergaderden eenen dans,
Doen sanck daer eenen voys courtoys
Met so soeten claren voys:
Comt ghy ghesellekens koene
Speelt met u schoon lief int groene,
Maeckt jolijt, tot elcker spijt
Op desen tijdt wie u benijt.

[p. 134]

 

Ter wijlen dat wy aldus vrolijck songen

 

Vreuchde bedreven delicaet,

 

Discoort quam daer uyt ghespronghen

 

Seer verrompelt ende quaet

 

Maer haer raet wort niet gheacht

 

Want sy songhen met grooter macht:

 

Comt ghy ghesellekens koene

 

Speelt met u schoon lief int groene

 

Maeckt jolijt tot elcker spijt

 

Op desen tijt // wie u benijdt.

 

Het waer hier also lustich blyven

 

Sprack den edelen Prince jent

 

Mocht ick na my selfs berijven

 

Mijn liefken spreken hier present,

 

Ter wijl ick was in dit ghepeys

 

Song Cupido noch een reys

 

Comt ghy ghesellekens koene

 

Speelt met u schoon lief int groene

 

Maeckt jolijt, tot elcker spijt

 

Op desen tijt, wie u benijdt.