Nieu groot Amstelredams liedt-boeck


[De mey playsant, willen wy planten]
Op de voyse: In een groot ongheluck ben ick gheboren. De mey playsant, willen wy planten Tis nu den tijt so dat behoort men siet nu vreucht alen alle canten De voghelkens singhen met soet accoort, De bloemkens staen seer wijt ontloken Al deur den dou en sonne claer, Sy staen ter velde met soete roken Coemt met u lieffkan paer aen paer. Comt met u liefken en wilt inhalen Den mey seer soet en wel ghebloeyt, Men sal u loonen vry sonder falen Want uyt de mey veel liefden groeyt. Den rechten tijt is nu voor handen, Comt met u liefken vry onverstoort Trect met u liefken in Venus banden Wt rechter liefden soo dat behoort. Die liefste eerbaer wilt eer bewijsen Het is voorwaer een schoon kerssou, Sy doet u harteken so dickmael rijsen, Dus weest in liefden altijt ghetrou. Op harpen snaren, wilt triumpheren En lustich singhen met blind gheschal Voor u liefs vensterken: het is haer ter eeren Dees meyen tijt gaet boven al. Adieu Princesse ontfangt dees meye Die u ter eeren nu is gheplant d’Almogenden God wil u gheleye En u vreucht vermeeren u en elcken cant