Nieu groot Amstelredams liedt-boeck


[De mey playsant, is lustich int useren]
Op de wyse: Een liedt eerbaer. De mey playsant, is lustich int useren Seer triumphant Gaet met u lief spantseren, Int groene lant,met boomen schoon geplant, Daer Venus sal regeeren Cupidos hant,sal veucht aldaer vermeeren Twist en haet is vande liefd’ verdreven, des nijders praet, wort geen gehoor gegeven dies coemt al uyt, dier sitten inde muyt, Met Amoureus verlangen, Met soet geluyt, wilt desen mey ontfangen. Den fraeyen sant, der voglen wilt aenhooren T’lustich geclanc, wilt vreuchdeke nasporen Vroech en laet, met u lief spanceren gaet Onder de groene bomen doet Venus raet, tsal zijn tot uwer vromen De bloemkens, nu wter aerden spruyten door tsoet bestier, al van des meys virtuyten met goede vreucht, u jonge hert verdeucht In dese meyes tijden, u jonge jeucht, Sal u van sorch bevrijden. prins exellent, verheucht u sin blymoedich der vreuchden tent, sal Venus zijn behoedich
[pagina 84]
Orpheus wort, zijner snaren accoort, Wilt u net sangh vermenghen, Muse comt voort, en helpt de mey volbrengen