Een nieu Guese liede boecxken(1576)–Anoniem Een nieu Guese liede boecxken– Auteursrechtvrij Vorige Volgende [Folio 81r] [fol. 81r] Een Liedt van de Spaeniaerden, hoe sy met list binnen Antwerpen gecoomen zijn, ende haren moetwille daer in bedreuen hebben. Vvie wil hooren een droeuich Liedt Wat binnen Antwerpen is gesciet men sach daer kermen en weenen Om dat de Spaeniaerts brochten int verdriet Die Burghers al ghemeene, Groot en cleene. Als nu by Moock was gedaen die slach daer na men Tantwerpen groot iammer sach Van duckdaluens Ruyters ende Knechten Antwerpen te beroouen maecten sy een verdrach, Tweendertich Vendelen sachmen rechten Moschassen ende spechten. D'opperste vant Casteel had haer Eedt ghedaen, Als sy Graef Lodewijck hadden verslaen, souden sy van Antwerpen voorschreuen Haer oude betalinghe heel ontfaen, sy en souden om lijf en leuen Tvelt niet begeuen. Die Spaeniaerts zijn gecomen met gewelt Tweendertich Vendlen waren daer getelt En riepen tot die Burgers verheuen: Ghy Lutrianen scheyt van v goet en gelt, Wilt ghy behouden dat leuen, [Folio 81v] [fol. 81v] Tis ons al gegeuen. Die Burghers hadden op Granvels Broeder toeuerlaet, Dat hy soude weeren der spaeniaerts quaet Maer d Monick liet zijn schelmerije blijcken, Hy lietse neffens t Casteel in Andtwerpen vermaert, Dat de Burghers moesten beswijcken Arm end Rijcken. Seer haestich liepen sy als Turcken snoot Door die Stadt met schrickelicken ghetiere groot, En deden de Burghers groot versmaden Betaelt, betaelt ons met der spoet, Of v gheschiet gheen ghenade Vroech noch spade. Die Spaeniaerts waren seer verwoet, Om te beroouen der Burgers goet, De schepen die sy gheladen vonden, Moesten weder ontladen metter spoet En drijuen daer flucx van Landen, Of men woudese verbranden. Des nachts liepen die Rabauwen stout Met fackelen ende hamers menichfout Of sy al de deuren wouden op iaghen, Also dat die Vroukens met kinde benout, Zijn doot gebleuen door vertsaghen, Dat haer mans aensaghen. Die Gouuerneur heeft een eysch gedaen [Folio 82r] [fol. 82r] Vier Tonnen Gouts woude hy haen, Vander stadt van Antwerpen vercoren, So woude hy de Burgers van stonden aen ontslaen, Meer wilde hy hebben van die Cantoren, Of tbleue al verloren. Dus heeft de Gouuerneur, wilt dit verstaen, Thien Tonnen Goudts wt Antwerpen ontfaen Aldus can hy den Tienden Penninc halen Al costet golden en silueren schalen saen, Om zijn Spaeniaerts ende Walen Daer mede te betalen. Sijn dit getrouwe Soldaten coen, Die s Conincks Landen souden bystaen doen Monseur Haure met zijn Rabouwen Dry duysent Gulden gauen die Dorpen Rantsoen, Noch hebben sy de Boeren getrouwe Doorsteken ende doorhouwen. Die Hoochgheboren Prins van Oraengien bekant, Een vry Edel Heer wt dat Nederlant, Daer na hoortmen Tantwerpen verlangen, Maer den Gouuerneur als een Tyrant, Die doetse deerlick vanghen, En aen een Galghe hanghen. So lang als ghy den Prins houdt wr dat lant, [Folio 82v] [fol. 82v] Can hy v schatten en scheeren aen elcken cant, Den Tienden Penninck met liste crijgen, Ghelijck Duckdalue den ouden quant SaI hy dan oock gaen vijghen Al stil swijghen. Vorige Volgende
Auteursrechtvrij Auteursrechtvrij Auteursrechtvrij
Auteursrechtvrij
Auteursrechtvrij