Een nieu Guese liede boecxken
(1576)–Anoniem Een nieu Guese liede boecxken–
AuteursrechtvrijOp de wijse: Rijck Godt wie sal ick claghen, Ofte Wilhelmus van Nassouwe.Vvilt ghy Nederlanden
Te samen wesen verblijdt,
Middelburch is in handen
Des Princes nu ter tijt,
De Prince van Oraengien
Door sijn Vorstelick ghemoet,
Drijft het Chrijchsvolk van Spaengien,
Wt Middelburch met spoet.
Alleyn tot v weluaeren
Voert de Prins desen strijdt,
Om v te openbaren
Hoe ellendich ghy zijt:
Soo ghy v laet regeeren
Door vreemden Spaenschen aert,
| |
[Folio 78v]
| |
Die v soekt te pilieren,
En daghelicks beswaert.
Hoe heeft Middelburch schoone
Verdraghen tshonghers cracht,
Als t Lants vryheyt ydoone
Niet beter heeft bedacht?
Wat hebben ander steden
En Landen int ghemeyn,
Dus langhe alsins gheleden
Door die Spaengiaerts onreyn?
Vwe dochters en vrouwen,
Bedenckt met herten vroet,
De vrijheyt der Landouwen
En de Jnwoonders soet,
Wilt vant tghewelt beurijden
Deser Vreemder hier naer,
Die Schattinghen en wilt niet lijden
Des Thienden Penninck swaer.
Die Spaensche Jnquisitueren
Die v hebben gheplaecht,
Verdrijft wt uwen Mueren,
Ontfangt v volck veriaecht
Laet Godes woort floreren,
V daer niet teghen stelt,
Soo sult ghy prospereren,
En vreesen gheen ghewelt.
Wilt v tsamen verbinden
Teghens de vreemden wreet:
Waeyt niet met allen winden,
Bedenckt doch uwen Eedt:
| |
[Folio 79r]
| |
Om tvolck t'houden in vreden
Hebt ghy ghesworen tsaem,
Het Lant by zijn vrijheden,
Te bewaren bequaem.
De Coninck is v schuldich
Na zijnen Eedt, tis claer,
t Lants vrijheyt menichfuldich
Te beschermen eenpaer:
So hy dat niet wil houwen,
Maer ghebruyckt cracht en ghewelt,
Van uwen Eedt vol trouwen
Heeft hy v vry ghestelt.
Den Prins wilt die hant bieden
Die voor v tleuen waecht:
Maect dat de vreemden vlieden,
Daer ouer elck man claecht:
Wilt ghy dit niet beherten,
Soo ghy moetwille drijft,
Tis weert dat ghy met smerten,
Eewelijck slauen blijft.
Dies met vromen ghemoede
V Landt, lijf, ende Goet,
Wijf en kint als de vroede,
Beschermt nu wat ghy doet:
Verliest ghy nu ten tijden
Dese bequaemheyt groot,
U naeckt van allen zijden,
Dienstbaerheyt, angst, en noot.
Nederlant ghy zijt neder
Door de Spaengiaerts gedruckt:
| |
[Folio 79v]
| |
Staet op, end staet hem weder
die v soo scheert en pluct,
Maect met den Prins ghepresen
Een sterck verbont voortaen:
Voorspoedich sult ghy wesen,
Oorlof, vaet dit vermaen.
|
|