Een nieu Guese liede boecxken

Een nieu Liedeken

Op de wijse Sy plach my eens te vraghen.

Vvat seytmen nu van Duckdalue?
De Boter ghelt vier en halue,
Js dat niet veel te dier:
O Prince van Oraengien,
Ducdalf sal moeten na Spaengien,
Hoe sal hy comen van hier

[fol. 72v]

 

Wat seytmen van die Spechten?

 

Het zijn Ducdalues knechten,

 

Ruydich, rappich ende zeer:

 

Tegens donnosel en slechten

 

Willen sy sterck gaen vechten,

 

Schoorsteenveghers sonder leer.

 

 

 

Met haer Fluweele Broecken

 

Gaen sy de Meyskens besoecken

 

Maer wat daer onder schuylt,

 

Tzijn haer Pockighe doecken,

 

t Gasthuys sy versoecken,

 

Van binnen zijn sy vervuylt.

 

 

 

Jn Spaengien en zijnt maer Fielen,

 

Daer loopen sy met Kackhielen,

 

Al zijnse hier groot gheacht:

 

Van Luysen ist dat sy krielen,

 

Tzijn Moordenaers der Sielen,

 

Ghespuys om te vullen de gracht.

 

 

 

Vijchkoruen connen sy breyen,

 

Ranckskens connen sy leyen,

 

Wijngaert snijden onder d Eerde

 

Dan lotert haer de Keye,

 

En sy gaen haer vermeyen,

 

Spaceren op een Peert.

 

 

 

Sy willen om ons ghelooue

 

Dees Landen heel beroouen,

 

Als Ducdalue haer doet verstaen

 

Maer Godt al van hier bouen,

 

Diemen altijt moet louen,

 

Die salse noch verslaen.

 

 

[fol. 73r]

 

Ey oude Grijs Duckdalue,

 

Hebdy nu niet meer salue:

 

Of zijt ghy genoech ghesmeert:

 

Ghy zijt ten heelen noch ten haluen,

 

V Coe wil niet meer kaluen,

 

Twelck uwen Paus seer deert.

 

 

 

En ghy Duckdaluen sone,

 

die boosheyt zijn ghewoone,

 

Om dat ghy hebt vermoort

 

So menighen Parsoone,

 

daerom Godt wt den Throone

 

Op v is seer ghestoort.

 

 

 

O Prince van Oraengien,

 

Edel Vorst wt Almaengien,

 

maect ons dees Tyrannen quyt:

 

Sy doen ons groote calaengien,

 

Jaechtse weder na Spaengien,

 

So crijghen wy goeden tijt.