Een nieu Guese liede boecxken
(1576)–Anoniem Een nieu Guese liede boecxken–
AuteursrechtvrijOp de wijse van den storm van Munster.Vvie wil hooren een nieu liet,
Wat nu tAmsterdam is gheschiet,
Dat sal ick v verclaren,
Van Duckdalve hoort mijn bediet,
Js Banckeroet gheuaren.
Don Frederijck had hy wt gesandt
Te Alckmaer in Noorthollant,
Al om de stadt te winnen,
Hy moest daer ruymen tzijnder schant,
Twas Banckeroets beghinnen.
Hy sond den Graue van Bossou,
Die sou de Geusen brengen in rou,
Jn de Noorthollantsche steden,
Hy raecte te Hoorn in de Kou,
Duytschen en Spaengiaerts mede.
Duckdaluens meyning die faelgeert,
Hierom heeft hy ghepractiseert,
Hoe hy met zijn Juweelen,
| |
[Folio 71v]
| |
Wt mochte comen tot zijn begheert
Om Banckeroet te spelen.
Derthien Burgers, hoort dit bescheyt,
die hadden hem gelt by gheleyt,
Sy en hebben niet weder vercreghen:
Tot Jan Perseyn, twert v gheseyt,
daer was hy thuys geleghen.
Tweemael liet hy Trompetten slaen,
So wie betaling wilde ontfaen,
Sijn Logiment stont open:
die derthien Burgers quamen saen,
die meest heeft hy geroepen.
Die meest van allen, twort v verclaert,
Was Jan Perseyn, Duckdaluens Waert
Hy sprac: segt my die schulden:
Jan Perseyn sprac onueruaert,
Tzijn veerthien duysent gulden.
Die ander twaelf in corter stont,
De sommige maenden twee dusent pont
som veel dusent ducaten schoone,
die minst van allen, ic segt v bloot,
Quam derdehalf dusent Croonen.
Duckdalue sprack, seer wel bedacht:
Morghen als die Clocke slaet acht,
Jc belooft v lieue ghesellen,
Het gaet nu tegen die duyster nacht,
Jck salt v morghen tellen.
Hoort toe wat hy des nachts begon,
Met zijn volc tooch hy op de ron ,
Hy speelde dat spel te deghen,
| |
[Folio 72r]
| |
Hy ruymde al met de Noorde Son,
Als Banckeroetsluy pleghen.
Smorghens doe die Clock hadde acht
Die Burghers quamen met eendracht,
Sy behoefden Kar noch Waghen,
Buydel noch Tasch haer niet en ghebrack,
Maer tgelt was goet om draghen.
Sy meynden daer te ontfangen ghelt,
Maer twert haer daer al op den Rooster getelt,
Sy cregen nieuwe maren,
Hoe dat Duckdalue, twort v vermelt,
Na Brabant was gheuaren.
Jst dat het Duckdalue niet en faelt,
Dat hy den Tienden Penninck haelt,
Wt al die Geuse steden,
Alsdan so sult ghy worden betaelt,
Schickt v so lang te vreden.
Oorlof, Duckdalue niet en laeckt,
Al heeft hy v Buydels cael ghemaect,
Ghy moet hem dit vergheuen,
Als de Monick in v Cantooren raeckt,
Het salder anders cleuen.
|
|