Een nieu Guese liede boecxken
(1576)–Anoniem Een nieu Guese liede boecxken–
Auteursrechtvrijna de wijse, Ten had my niet ghespeten, dat leet dat ghy my doet.Vvie ons nu beclaghen,
Ons Borgers wel bekant,
Want wy ons seluen iaghen,
Al wt ons eygen Lant:
Ons huysen en Boomgaerden
Verlaten wy metter spoet,
Beminnen de Spaengiaerden
Die niemandt en doen goet.
Had ons de Geus verdreuen
Als sy wel worden ghedaen,
So waer hem schult te geuen,
Maer wy zijn self gegaen,
Wy en doruen niemant vloecken,
Tcoemt door ons eyghen raet,
Dat wy in allen hoecken,
Nu sitten desperaet.
Doen wy ons goet verlieten,
Doen hadden wy ghepast,
Die Geus te zien vernieten,
Te bringen in die last,
| |
[Folio 67r]
| |
Al binnen veerthien daghen
Maeckten wy malcander wijs,
Souden wyse sien veriaghen,
Haer goeden maecken tot prijs.
Te scheep waeren wy geleghen,
t'Enchuysen voor de stadt,
Hadden wyse doen gecregen,
Wy haddense al gehadt,
Wy achtense voor ontbijten,
Noch hebben sy geen pijn,
Tmach ons te recht wel spijten
dat wy dus bedroghen zijn.
Don Fredrick was gecomen
Dry weken voor Kersmis,
Wy gingen ons beromen,
Ons saeck stondt heel int wis:
Ons vrienden lieten wy weten,
die Sop most zijn ghereedt,
Wy woudense met haer eten,
Twaer Geus lief ofte leedt.
Sy hielden haer Sop met vreden,
Tot Nieuwe Jaer henby,
die Pancoecks dagen voorleden
die Paescheyeren gingen voorby,
die slachtijt ginck genaken,
Sy saten noch gherust,
doe ginghen wy schepen toe maken,
Nae Beulingh hadden wy lust.
Maer doen wy derwaerts quamen,
| |
[Folio 67v]
| |
die Geus quam ons te moet,
die Beulinck die wy vernamen,
En smaeckte voor ons niet soet,
Te rugge so mosten wy keeren,
dat dede cruyt en loot,
Bossu worde met zijn Heeren
Op Worst ende Beulinck ghenoot.
Voor Alckmaer ende Leyen
Heeft Godt ons knechten veriaecht,
Hoe dat wy langher beyen,
Hoet qualicker met ons daecht:
Nu moeten wy leeren sparen,
Of vaeren op vrijbuyt,
dat Rijcke luyden waeren,
die comen tot sint Reynwt.
Oorlof die nu noch leuen,
Van die daer zijn gheruymt,
Hadt ghy by huys ghebleuen
Ghy en hadt niet veel versuymt,
Hadt ghy met vrienden en Bueren
V lijf en leuen ghewaecht,
Verwacht soet ende sueren,
so dat den Heer behaecht.
|
|