Een nieu Guese liede boecxken

De Prince van Oraengien ten tweeden mael wederom int Lant comende worden de Reden vermaent hem bystant te doen,

Op de wijse, van Wilhelmus

[fol. 54r]

 

Ras seuenthien Provencen

 

Stelt v nu op de voet:

 

Treckt de coemste des Princen

 

Vriendelick te gemoet:

 

Stelt v met zijn Banieren,

 

Elck als een trouwe man,

 

doet helpen verlogieren

 

Duckdalue den Tyran.

 

 

 

Hy en coemt v niet verderuen,

 

dit trouwelicken ghelooft:

 

maer v wederom te eruen,

 

Jn dat v us berooft

 

Te goede den Coninck van Spaengien

 

doet vrymoedich hem bystant,

 

den Prince van Oraengien

 

Als zijnen Luytenant.

 

 

 

Sijn Trommelen en Trompetten

 

Bringhen v gheen dangier,

 

Ten is maer om versetten

 

Duckdalue den Bloetghier:

 

Spijt Ruyters en Soldaten

 

die den Prince benijdt,

 

Hun schade sal v baten,

 

Hy moet ten Lande wt.

 

 

 

Al hoordy veel allarmen

 

Hier ende daer gheschien,

 

Hy doetet wt een ontfermen

 

Ouer v Landt en Lien:

 

V dient stercke Purgacy,

 

Ende sulcken bitter cruyt,

[fol. 54v]

 

Op dat ghy de Spaensche Nacy

 

Wt uwen Lande sluyt.

 

 

 

Vlissinghen heeft so begonnen

 

Te spelen sulcken dans,

 

Daer met heuet ghewonnen

 

Recht der Laurieren Crans:

 

Hollant wilder aen waghen

 

Alle zijn principael,

 

Laet dit werck behaghen

 

Ghy Landen generael.

 

 

 

Ten is om gheen pillagie

 

Van Vrienden, Landt, en Ste:

 

Doch de groote couragie

 

Des Grauen van Lume,

 

De Graue van Nassouwe

 

Dat reyn vroom Edel bloet,

 

Wilt niet dat men yemant benouwe

 

Aen zijn eere, lijf oft goet.

 

 

 

Schickt v boose Rebellen

 

Die t Lants weluaert benijdt,

 

Des Antechrists ghesellen,

 

Die de waerheyt bestrijdt,

 

Gods woort en wet versmaders,

 

Ja zijnen heylighen Throon,

 

Ghy sult als Landtverraders

 

Noch crijghen uwen loon.

 

 

 

Krijslieden wilt v oprusten,

 

Jn Godt bestaet v cracht,

 

Strijdt Ridderlick met lusten,

 

Op Storm, slach ende Wacht,

[fol. 55r]

 

Voor Gods woort, ende t Lants Rechten,

 

Met een verbonde schult,

 

Den Solt der vromer Lansknechten

 

Ghylieden ontfanghen sult.

 

 

 

Wilt sweert noch spiessen sparen

 

Soo Babel heeft ghedaen,

 

Ouer Gods trouwe Dienaren,

 

Laet haer den loon ontfaen:

 

Den Voghelen wilt Maeltijt coken

 

Al van der Hoeren vleysch,

 

Dat bloet sal worden ghewroken

 

Al na der Schriftueren heysch.

 

 

 

Prinslicke Godt ghepresen,

 

V volck Victory gheeft,

 

Dat haer werde bewesen

 

Dat ghy regeert en leeft:

 

Want sy na v Woort haken

 

Met herten seer benout

 

Tot dat ghy in allen saken

 

Den lof end prijs behout.