Een nieu Guese liede boecxken
(1576)–Anoniem Een nieu Guese liede boecxken–
AuteursrechtvrijLofsangs wijse ghedaen, op de wijse vanden lxviij. Psalm: staet op Heer thoont v onuersaecht: oft Ydt zijn doch salich alle die. | |
[Folio 51v]
| |
Coemt al ghy Geuskens hier ontrent,
En laet ons singen partinent,
En met vreucht iubileren:
Van Bergh in Henegouwen hoort
Singen wy nu met blijd accoort,
Om vreucht nu gaen vermeeren:
Twaelf Hooflingen Coopmansche wijs
Trocken daer in, hoort mijn auijs
Tsauonts in haer logijsen,
Haer sinckroers leyden sy van haer,
En spraken met den weert aldaer,
Sy moesten vroech op rijsen.
Segt ons doch nu heer weert seer coen
Wat eur men smorghens gaet op doen
de Poort van deser stede.
Twee wagens met wijnen seer goet
Sullen daer staen, na mijn gemoet
Voor die Poort al ghereede:
Voor den opganck der Sonnen claer,
Wild ick wel datmen mocht voorwaer
De Poort vroegher opsluyten,
Eer de cracht des sons haer beschijnt,
Op datse niet ganslick verdwijnt
mochte comen van buyten.
Die weert antwoord in corter stont,
meynde dat hy wijncoopers vont,
smorghens ontrent vier uren
Die Poortier gaet end ontsluyt
Die Poorten, als de Clocke luyt,
sonder eenich ghetrueren:
| |
[Folio 52r]
| |
Wilt ghy dat hy vroegher op stoet,
Een gheschenck gheeft wt uwen goet,
Hy sal hem laten vinden,
En sal v Wijnen excellent
Jnlaten seer by v bekent,
So goet als eenre kinde.
Smorgens vroech zijn sy al ontwaect,
En by de Poort vlijtlijck ghenaect,
Een geschenck sy hem schenckten:
De Poort worde daer opghedaen
met eenre Sinckroer wel ghelaen,
Daer sy hem mede crencten:
De Sleutelen al van die Poort
Namens' hem af, gaet singt het voort,
En sy die wel bewaerden
Graef Lodewijck met veertich Man,
Kennis hebbende, reedt hy an,
Wel toegherust met swaerden.
Graef Lodewijck cloeck int verstant,
Een wijsen Vorst, end oock vaeliant
Quam daer in met zijn knapen:
De straten heeft hy so beset,
Niemant en heeft daer opghelet,
So dat hy haer ginck drapen:
Rennende door de gantsche stadt,
En wie buyten der deuren tradt,
Een loot ginck hy haer gheuen:
Vrijheyt (riep hy) is v ghegunst,
Was dat niet een aerdighe kunst
| |
[Folio 52v]
| |
Van sulcken Vorst bedreuen?
Van vier uren, end vijf, end meer,
Van ses, end seuen, hoort mijn leer,
Rende hy door de strate:
De Prince van Orangien bout,
Met een ghedruys so coemt hy stout,
Riep hy, coemt v te bate:
Vrijheyt vrijheyt sal met v zijn,
Ghy wort verlost op dit termijn,
Den Thienden Penninck clachtich
Wil hy afkeeren nu ter tijt,
En beurijden v in dit crijt,
Van sConincx weghen machtich.
Dat maecten een so groot gheschal,
Recht of daer was een groot ghetal
Van ruyters ende Paerden,
Wie zijn deur op deed ende plas,
Daer schooten sy een loot in ras,
Soo dat sy haer veruaerden,
Vijf uren lanck reden sy seer,
Gheen ontset en quam daer noch meer
Den Graef ghinck wt na rijden,
Naer t Bosch daer sy waren verdwaelt,
Graef Loodwijck keerd' weer ongefaelt,
Om dander te verblijden.
Vijf hondert ruyters ient en reyn,
Comen daer hen springhen certeyn,
Met een Hakenschut achter:
Sy renden met vlieghende macht
Al na de stadt hebt hier op acht,
| |
[Folio 53r]
| |
Om t'ontsetten den wachter:
Ghevloghen zijn sy door en weer,
Wat seltsaem Wonder gaf de Heer,
Het Raethuys sy aenuingen,
En stelden haer in een Slachoort,
En mochtent hebben al vermoort,
Maer ghingen hen bedwinghen.
Gods wonder werck wort hier verclaert
Door d'Edele Graue wel vermaert
Met veertich Ruyters vloghen,
En renden so de straten door,
Dat niemant dorste comen voor,
Want sy waren bedroghen:
Men vant aldaer des Alfs gheschat
Sijn leeren Schuyten, ist niet wat?
Sijn Brugghen oock daer neuen:
Oock Noortcarmens vergaerde gelt
Worde daer oock al ongetelt
Den Ruyters om gegeuen.
De Bisschops Stauen, Mijters mee,
Vantmen oock aldaer ontrent ree,
Melis huysen by hoopen:
Wt gout ende siluer wel gemaeckt,
Kelcken en Pullen wel gheraect,
Daer sachmen Papen loopen:
Arcken van gout en siluer fray
Sijn daer gebrocht al in de May,
Met Crucifixen mede,
En Mariens Beelden meer met,
| |
[Folio 53v]
| |
Anderen oock aldaer int net,
Van siluer groot en breede.
Hierom O Godt, v moghentheyt
Wort ons vertoont in een claerheyt,
Jn aller menschen ooghen,
Ghelouet zijt ghy t'aller stont,
dat wy v reyn van hertsen gront
Louen en prijsen moghen:
Ghy zijt alleyn victorieus,
Waghen noch Ros en helpt den Geus,
Noch can niet wt gaen rechten:
Maer ghy hebt ons vyant seer snel,
Ghestouwet als den pharo fel,
die niet dan moorden plechten.
Prince, dit is ons aenghedient
Van eenen goeden vromen vrient
Vanden Graef afghesonden,
Aen zijn Broeder Oraengie fier,
die vertrocken is al van hier,
En was hier niet ghebonden:
Neemt dit hen op in dancbaerheyt,
Hier in hebt ghy nu alle bescheyt,
En gatet ouerlegghen:
De Heer heeft t Radt al omghewent,
Hy treedt met ons nu inden Tent:
Meer can ick nu niet segghen.
|
|