Een nieu Guese liede boecxken
(1576)–Anoniem Een nieu Guese liede boecxken–
AuteursrechtvrijOp de wijse, Jck roep v O Hemelsche Vader aen, etc.Vvie wil hooren een nieu ghesanck,
Wat nieus sal ick aenheuen,
Hoe dat die Geusen namen haren ganck,
Wt Enghelant met haren danck,
En hadden in haer beuanck,
Haren Admirael verheuen.
Dat was den hoochloffelicken Heer
Van Lume gheheeten,
Met hem dat hy hadde noch meer,
Torlon, vernamet veer,
Na de Hollanders haer voechden seer,
Sy dapper daer na stieten.
Het gheschiede op eenen Palmendach,
Smorghens ontrent acht uren,
Dat sy aenuielen met groot ghewach,
Die vloot al sonder verdrach,
Tgeschut als een donderslach
Men aen beyde zijden mocht hooren.
Daer quam wt Spaengien met de vloot
Een Buys, daer sy na loerden,
Die sy met menighen schoot
Jn namen met harden stoot.
Twee kisten met ghelde groot,
| |
[Folio 47r]
| |
En specery sy daer wt voerden.
Op eenen Dincxdach traden aent Lant
Al die Soldaten en Capeteynen,
Daer sachmen menighen fraeyen quant,
Wten Briel sy schoten te hant,
Sy meendense te keeren, want
Met vliegende Veendels sy aenquamen.
Met een Trompet al sonder ghetreur,
Sachmen Torlon gaen treden,
Ende hy quam ten Briele vuer,
Hy seyde: Doet op de duer,
Want al v Vesten en muer,
Cont ghy voor ons niet houden.
Van wegen den hoochgeboren Heer
Van Oraengien ghepresen,
Gaf hy haer beraet een ure of meer,
Sy gauen geen antwoort weer
Lume die haeste hem seer
Met zijn hoopen wtgelesen.
Twee Tonnen met Bussencruyt gelaen
Voor de poorte sy ginghen legghen,
Die sachmen hen daer steken aen,
Die Poorte die brande saen,
Die Borghers goetwillich op daen,
Dander Poorte sonder wedersegghen.
Alsmen schreef twee en tseuentich Jaer
Den eersten Aprillis tot desen,
Doen namen sy in, en dat is waer,
Den Briel al sonder vaer
Terstont sy ginghen maken claer,
| |
[Folio 47v]
| |
Melis Tempel ghepresen.
Ghelijck alsmen leest in Samuel,
Door die Arcke sijn ghebroken,
Alle die Afgoden also snel,
De Schaker en zijn ghesel,
En metten grooten Bel,
Een Vyer sy gingen stoken.
Ducdalue mocht verdraghen niet
Den Bril op zijnen Neuse,
Daerom wt Wtrecht hy trecken hiet,
Hoort al na mijn bediet,
Thien Vaendel Spaengiaerts siet,
Om te verstooren de Geusen.
De spaeniaerts waren niet wel gemoet
En Bossu bloetgierich beuonden,
Sy traden in sommighe schepen onsoet,
Ende meenden verwoet,
Te wasschen haer handen int bloet
Die sy inden Briele vonden.
De Geusen iaechden haer dapper daer
Die Spaengiaerts aen den gront setten
Haer Schepen, dats openbaer,
Door die Kley met grooter vaer,
Haer Vaendels die sleypten naer
Nae Dort wilt hier op letten.
Die spaeniaerts begaet met drec belaen,
Voor Dort sy deerlijck stonden,
En meenden in te raken also saen
Maer sy mosten buyten staen,
Die Borghers wildense niet in haen
| |
[Folio 48r]
| |
Hoort al mijn vermonden.
De Spaeniaert quam voor Rotterdam,
Die Poorten sy vonden ghesloten,
Met verraderye also gram,
De Spaengiaerts inne nam,
Met gedruys daer inne quam,
Dat den Burgher heeft verdroten.
Wel twee hondert daer bleuen doot,
Die de Spaengiaerts daer doorstaken,
Noyt Burgher was in meerder noot,
Daer was ghecrijs seer groot,
End de straten van bloede root,
Als een Harinck sachmense kaken.
Alle de steden cleyn en groot,
Wilt hier doch wel op mercken,
Laet v dit wesen in der noot,
Een Exempel end spieghel bloot,
Houdt v vast totter doot
Voor die sulcke boosheyt wercken.
Die van Vlissinghen ghemeyn,
En geheel Walcheren machtich,
Met haer so trocken eenen lijn,
Die vander Vere fijn,
Met die Boeren sy eens zijn,
Middelburch sy dwinghen crachtich.
Des Alues Rijcke heeft een ent
Jn dat Zeelant vercoren:
Sijne Zeeuaert is gheschent,
Want die Wielinghe also ient,
En de Maze excellent,
| |
[Folio 48v]
| |
Dit heeft hy nu verloren.
Lof Prince onse Godt altijt,
Wilt verlossen tot desen,
Die om uwe Waerheyt zijn benijdt,
End v soecken met herten vlijt,
En die voor den uwen strijt,
Wilt die behulpich wesen.
|
|