Een nieu Guese liede boecxken
(1576)–Anoniem Een nieu Guese liede boecxken–
AuteursrechtvrijOp de wijse, Laet ons den Landtman louen, etc.Ghy Hoenderen, Enden en Duyuen
Wilt v verblijden al,
Den Vos die op v plach te cluyuen
Die leyt nu in een dal:
Op den wech derf hijt niet houwen,
Dat heeft de Gans gedaen,
Die brengt hem int benouwen,
Met haer Jonghen sonder waen,
Die nu dapper broeden aen.
Die Vos subtijl van listen,
Die altijt pracktizeert
Twas wonder dat hijt niet en gisten
Dat die Gans dus swemmen leert!
Hoe wijdt dat zijn de stroomen,
De Gans die weet wel raet,
Om daer ouer te comen,
daer de Vos voren staet,
daerom heeft hijt nu so quaet.
Wat macht den Vos veel baten,
| |
[Folio 42v]
| |
Dat hy can loopen snel,
De gans can bouen maten
Oock vlieghen also wel,
Ouer Hecken, Bosschen, en Tuynen,
Tis haer niet inden wech,
Al loopt de Vos veel struynen
Sijn hol wort niet te leech,
Daerom ist met hem gheen deech.
De Vos die leyt veel laghen
Met den Wolf op dit pas,
Om de Gansen te veriaghen,
Daerom loopen sy so ras:
Maer ten mach niet profiteren,
Den Wolf is achter lam,
Sy connen de Gans niet leeren,
Daerom worden sy gram,
Dat die Gans dat hol in nam.
De Vos die heeft soo langhen
Ghebruyckt alle zijn macht,
De Gansen op ghehanghen,
Al door des Wolues cracht,
Maer nu coemt de Gans met hoopen,
Die dus lang heeft ghebroet,
Nu moet de Vos voor loopen,
Met den Wolf seer verwoet,
Van de Gans al metter spoet.
Had de Vos moghen ghebruycken
Syn wil ende zijn lust,
Die Gans had moghen duycken,
Want de Gans doch niet en rust,
| |
[Folio 43r]
| |
Hy meynde onder hem te vercrijghen,
Alle macht ende ghewelt:
Maer nu moet de Vos swijghen,
En wijcken wt dat Velt,
Want die Gans is seer ontstelt.
De Gans die heeft vernomen,
Met so menich cleyn ghedier,
Hoe den Vos sonder schromen
De Wolf wil senden hier,
Om haer Jonghen te beroouen,
Die Thienden te nemen wt dat Nest,
End oock van alle schoouen,
Daer sy aen plucken haer best,
Souden sy hebben ghemest.
Dese Mare is vertoghen
Onder menich Voghel cleyn,
Die zijn by een ghevloghen,
Ende comen alle ghemeyn,
Al om dees Vos te verdrijuen,
Den Wolf te smijten doot
Daerom comen sy stijuen
Met eenen gantschen Vloot
Nu is de Vos in grooter noot.
Het is doch eene wijse
Dat elck heeft zijne beurt:
Als deen daelt, moet dander rijsen,
Na blijschap coemt lijden voort:
Na lijden, en bitter tranen
Coemt blijschap sonder ghetal:
Elck die moet ontfanghen
| |
[Folio 43v]
| |
Loon na zijn wercken al
Eer dat eynde comen sal.
Prince der Creatueren,
Exempel op dit termijn,
Een yegelijck moet besueren,
Na blijschap groote pijn:
die daer sadt in weelden,
Met vreuchden ongefaelt,
Twas droefheyt dat hy teelden,
Als hy zijn vruecht in haelt,
dat wort hem al betaelt.
|
|