Een nieu Guese liede boecxken


Een ander vanden Thienden Penninck.
Op de wijse, wilt my niet straffen Heere. O HEER wilt my eerbarmen Ouer tsuchten en karmen Van ons armen eenpaer: Want wy zijn in groot lijden, O Heer wilt ons beurijden
[Folio 41v]
Jn dees benautheyt swaer. O Heer wilt van ons weeren, Die den Thienden Penninck begheeren, Die t Landt regeeren fel: End v volck ouerlasten: Ontslaet ons dese gasten, En van so groot ghequel. Haer Hooft is duck de Alue, De Paus die staet het halue, Om t Landt te berouen onsoet Legghen sy listighe laghen, O Heer wiltse veriaghen, Dit snoot Spaensche ghebroet. Sijn dit niet fraey ghesellen, Sy nemen Wol, en Vellen, Al van ons schaepkens slecht Die lancxt den dijcke loopen, O Heer laetse becoopen Seuen dobbel haer onrecht. Ghy segt: O Heer van allen, Dat Babel is gheuallen, Coemt maeckt v Woorden waer: Laet nu den Slach ghebeuren, Dat Babilon sal treuren, Met zijn valsche Dienaer. O Heere Godt Almachtich, V Woorden zijn warachtich, So Joannes schrijft openbaer: Dat haren val sal comen Jn een ure, dan salmen romen
[Folio 42r]
Uwer woorden voorwaer. Wee v Amsterdam onreyne, Die sulck vreemt ghespuys vileyne, So troulick bystant doet, Om v trouwe Nabueren Te vernielen, verschueren, Als Woluen seer verwoet