Van de Sondach,
Stem: Van den ouden Grijn.
DEn Sondagh is wel nae mijn sin,
Hy komt so ghemackelijck in,
Ick slaep met rust, soo langh 'tmy lust,
Ick wou dat altijt Sondagh waer.
Sondaeghs staet al't hant-werck stil,
Dat gaet soo wel al nae ons wil:
Elck tot zijn vrient, gaet daer 't hem dient,
D'een tot den aer, Ick wou, etc.
Het wercken is een groot verdriet
Voor een die garen werckt niet,
'tIs hem een plaegh, oock alle daegh,
In 't heele Iaer, Ick wou, etc.
Sondaegs gaen de Visschers uyt
Met emmers, Korf, al om de buyt,
Om vanghen met, Schakel, Werp-net,
Den Hengelaer, Hy wou, etc.
De Vroukens toonen dan haer vlijt
Om Sondaeghs te wesen verblijt,
Elck in zijn Huys, of by zijn Buys,
Of zijn Minnaer, Ick wou, etc.
De Knechten zijn dan oock bereyt,
Om te gaen al met de Meyt,
Gins ende weer, Naer haer begeer,
In 't groen een paer, Ick wou etc.
Van Haerlem al nae Santvoort,
Nae Velsen, Schooten gaetmen voort,
Nae Beverwijck, sonder beswijck,
Gheen Sant-wegh swaer, Ick wou, etc.
Nae Wijck-op-Zee is dan den gangh,
Seer lieffelijck, oock langs het Strang,
't Santvoort vermelt, en na 't Bentvelt,
't Overveen daer, Ick wou, etc.
Aelberts-bergh, Bloemendael alree
Stuyf-sant, en 't Huys te Breroo mee:
Den Kruytberg koen, met kruyden groen
Elck soeckt zijn paer, Ick wou, etc.
Nae Sparendam is 't principael,
| |
Daer aldermeest om den Pan-Ael,
Elck met zijn Min, Of zijn ghesin
Reyst hy door 't Spaer, Ick wou, etc.
Sparwou Pennings veer Rustenburg
Gaetmen vrolijck al sonder surgh,
Elck met zijn lief, na zijn gerief,
Ick wou dat altijt sondach waer.
'tSlot Heemstee en Hillegom blanck,
De Zillick en Vogele-Sanck,
Den Aerden-hout, in een groen wout
Speeltmen op snaer, Ick etc.
Oorlof hier mede op het lest,
De Luyaerts hebben't sondaeghs best,
Dan isser vreught, hier by de Ieught,
By elck eenpaer, Ick wou dat altijt, etc.
|
|
Auteursrechtvrij