Nieu Aemstelredams Liedboek

Op de wijse: De Fransoysen met wapenen aen, Oft, Gheeft my te drincken nae mijnen dorst.

GHy onbedochte jeucht seer slecht
Die hier in sweerelts lust comt kijcken,
Eer ghy v wel versint te recht
Gaet schoon samblant d'ooghen bestrijken
Met domme vreucht, en haer pracktijcken
Quade natuer comt v te baet,
En leert v de wijsheyt te wijcken
Door joncheyts daet reden ghy haet.

Vrijt ghy een Dochter in v jeucht

Let op haer vromicheyt tot eeren,
Ooc op haer Ouders, en haer deucht
Niet op haer chierelijcke cleeren
Daer t'jeuchdich hert d'ooghen nae keeren,
Neemt vry een Jonck, liever dan oudt,
Om v gheslachten te vermeeren
T'is haest ghetrout, dat lang berout,

Ghy dochters fier vroom opgevoet

Van Ouders eerelijck van namen
Den welcken ghy seer sorghen doet,
Bewijstse danck al naet betamen,
Laet sonder haer v niet beschamen,
Wacht v voor eenich ongheval
Soo sal v niemant connen blamen
Want Ouders sorghe gaet boven al.

Comt v een Vrijer in t ghemoet

Al is hy niet wel ws ghelijcke,
Spreeckt hy wel, gheeft hem woorden soet,
Laet wt v wesen vrientschap blijcke,
Reden en sal v niet beswijcken,
Al spreeckt hy wat, neemt ghy't verdrach,
Den Rechten doet gelijck den rijcken
T'is quaet dat men niet hooren en mach.

Hebt ghy een Lief die v bemint,

Doet niet buyten v Ouders weten,
Kent haer voor al wat ghy begint,
Swijcht voor haer niet uwe secreten
Begint met raet zijt niet vermeten,

[fol. 150]

 

De liefd' is blent, en heel vermomt,

 

Die v goet doen, wilt niet vergeten,

 

Buycht voor den boom daer t'goet van comt.

 

Princen en ghy Princessen goet,

 

Neemt doch in danck dit cleyn verhalen,

 

Gedoocht ghy tsuer, ghy crijcht het soet

 

Hebt pacienty ten sal niet falen,

 

Wilt op dees rijm doch gheensins smalen

 

Laet in v groeyen liefd' boven al,

 

Reden ghebruyckt in v vertalen,

 

Dus blijft courtoys ende loyael.

 

FINIS.