Nieu Aemstelredams Liedboek

Op de wijse, Mijn oochskens weenen.

BEdroefde herteken wat moet ghy lijden
Die verloren heeft zijn soete lief,
Onghetroost tot allen tijden,
Dien hy hooch al in zijn hart verhief.

En heeft haer altijdt eer bewesen,

Boven eenich Vrou ter Weerelt wijdt,
Maer door een ander wort ghy mispresen,
Geeft selfs getuyghenis wie dat ghy zijt.

Moet sy niet wesen straf van Natueren,

Dat sy haer liefken laet dus desolaet,

[fol. 50]

 

Ick seg ten zijn geen Venus cueren

 

Dat sy haer oochskens op een ander slaet.

 

Den viant is teghen vrienden en maghen

 

Die verlaten heeft die haer bemint,

 

Om een diet harteken geheel doet knaghen,

 

Hy is veracht, die eens was haer vrient.

 

Ben ick niet rijck van grooter machte

 

Of mijn wesen van ghedaente slecht,

 

Aenmerct mijn liefde van grooter crachte

 

Of soeckt ghy t'goet t'dunckt my onrecht.

 

Soo set ick Venus al op een sye

 

Met Cupido wil ick spanceren gaen,

 

Mijn liefken soeckt een ander partije

 

Om t'groote goet, soo ist haer al ghedaen.

 

O hart neemt moet wilt v vercloecken

 

Al pleecht ghy eens int hart te staen

 

Wy willen elders een ander soecken

 

Soo schoone wassender als daer vergaen.

 

V woorden licht, soet van vrouwen,

 

Die met alle winden waeyt,

 

Ick en cost v dat niet toe betrouwen,

 

V liefde was in mijn hart ghesaeyt.

 

Gedenct schoon liefken dat ic v verhaelde

 

Dat vrouwen sinnen, soo snellijck draeyt,

 

Met schoone woorden ghy my betaelde

 

Ten soude niet zijn, of ick waer gepaeyt.

 

Heb ick misseyt buyten mijn weten,

 

Daer ick v Lieveken mede heb verstoort

 

En wilt my daerom niet vergeten

 

Het waer my leet lief geeft my confoort.

 

Soo mach ick te recht wel spreken

 

Dat v liefde moet seer wanckelbaer zijn

 

Zo slecht misdaen en wort versteken

 

Dies mijn hart leyt in grooter pijn.

 

Had ick gheweten wat v harteken lusten,

 

Ick hadt gecregen waert in mijnder macht

 

Ick stel my selver in grooter onrusten

 

Voor dese loon en hadde ick niet ghewacht.

 

In wat ongheluck ben ick geboren,

 

Die ick bemin dat sy my haet,

 

Ick gunne haer deucht maer t'is al verloren

 

Want buyten reden wort ick versmaet.

 

Princesse vailliant doet na mijn rade,

 

Zo doet v lieveken die na v haeckt

 

Besiet ghy selve niet als de quade,

 

Hoe in liefden zijn harteken blaeckt.