Nieu Aemstelredams Liedboek

Op de wijse: Compt al ghy Venus Dierkens.

LAet ons met blijden gheeste,
Van harten vrolijck wesen,
Op dat in dese feeste
Ghenoech mach zijn geresen,

[fol. 28]

 

Die Waert schenckt ons met desen

 

Den rijnschen coelen wijn

 

Op dat wy sonder vreesen,

 

Hier souden vrolijck zijn.

 

Maechden een Jonghelinghen

 

Toont nu hier al gelijcke

 

Met Liedekens te singhen

 

Den aert der Rethorijcke

 

Hoe lieffelijck Musijcke

 

Voecht soo ghy meucht daer by

 

V jonst tot gonst laet blijcken,

 

Al hier met harten bly.

 

Wilt oock eens omme drinken

 

Om vreuchde te vermeeren

 

En elck een cusken schincken

 

V liefste Lief ter eeren

 

Tis Cupidos begeeren,

 

En Venus diet hem riet

 

Ten sal oock niemant deeren

 

Alst eerlijcken gheschiet.

 

Dees Beker wilt aenvaten

 

Edel Princesse verheven

 

V stem oock hooren laten

 

Om vreuchdelijck te leven,

 

Tis v soo voor gheschreven

 

Al hier tot deser stont,

 

Dies sal ick v noch gheven

 

Een cusken voor v mont.