Nieu Aemstelredams Liedboek



[Folio 17]
Op de wijse. Tribulacy en verdriet. DEn tijt is hier Dat men sal vrolijck wesen, Want in elck quartier Die May seer lustich staet, Sonder dangier, can Venus ons ghenesen Met Cupido fier, die sal oock gheven raet Om te verstooren des nijders tongen quaet Want sy benijden seer Dat yemant sou verblijden meer, Selfs sy besyden eer Vallen al in misdaet. Wy zijnse quijt Die ons hier deden smerte, Dies wy met jolijt Brenghen den mey playsant: Met appetijt // ghebruyckt elck vreucht int herte, Om dat haet en nijt Soo vast leyt in den bant Soo wort de alderliefste, den Lauwerier geplant, Noyt reynder liefde soet Pyramus Tisbe briefde vroet T'welck hem deurgrieven doet Doen hyse niet en vant. Hier woont die schoone, Laet ons die Mey hier draghen Selfs in persoone, als minnaers toebehoort Oft sy ydoone, schiep in den mey behaghen, Veel vreuchts ten loone Crijghen wy deur haer woort Want haer soete sprake Die gaf ons nu confoort, Als sy te ontsluyten plach Den gheest in swaere muyten lach Daermen uyt spruyten sach Reyn liefde met accoort. Prince eerbaer Liefde bracht ons te voren, Dies wy sonder vaer Vielen dus slecht ghesint Om dat alle jaer Den Mey doet vrucht oorboren Metter consten claer Met hem diese bemint,
[Folio 18]
Soo hebben wy eenpaer Ghelijck der consten vrient Sonder argelisten vry Soo zijn wy Catarinisten bly, Danckelijck neemt Artisten ghy Want ons liefde verwint.