Nieu Aemstelredams Liedboek

[fol. 7]

Op die wyse: Alst beghint.

SChoon lief wilt my ontfarmen
Door tbidden ende karmen
Van my ick segt v bloot
In v snee witter armen
Soo wilt my doch voorwarmen
Schoon lief eer ick blijf doot
En laet my nu doch wesen, uwen dienaer gepresen
En kiest voor my geen aer
So sal ick corts na desen // leuen sonder vresen
In dese nieuwe Jare.

En wilt my niet verlaten

Maer wilt compassi vaten, Nu en tot alder tijt
En compt schoon lief te baten
Die v seer bouen maten, Bemint int swerelts crijt
Oft anders sal ick steruen // ist dat ic nu moet deruen
V schoon ghesicht voorwaer
Die doot sal ick beeruen
Mach ick gheen troost verwerwen
In dese nieuwe Jaer.

My dunckt ick mach wel claghen

Nu en tot allen dagen, Dat ic dus ben verspiet
In wien ic heb behagen, Myn aldus gaet plagen
Met lyden en verdriet
En dat deur nyders treken
Die niet doen dan quaet spreken
Van my al teghens haer
Waer deur mijn hart wil breken
En roep om troost met smeken
In dese nieuwe Jaer.

Oorloff Princesse schoone

Bouen al spant ghy die croone
Hier in dees werelt wijt, Vwen dienaer ydone
Schenckt hem in deuchden loone
Die v bemint altijt
En laet die nyders vaeren // seer ver van ons verharen
Die ons benyden te gaer
Maer wilt my by v paren, so sal mijn vreucht verclaren
In dese nieuwe Jaer.