Nieu Aemstelredams Liedboek(1591)–Anoniem Nieu Aemstelredams Liedboek– Auteursrechtvrij Vorige Volgende [Folio 3] [fol. 3] Nieuwe Jaer Lieden. Op de wyse: Die Nachtegael die sanck een Liet, Dat leerde ick, etc. DAt oude Jaer is ons ontrolt ghelijck een cloot Die winter brengt ons t'nieuwe Jaer in zijnen schoot Die winter is een Heere, noch meere Hy compt seer stout, brengt ons die cout, Nochtans schiet hem groot eere. Van outheyt is geworden zijnen baerde grijs Wt vrieslant brengt hy vriesen herwaert ouer t'ys Drie maenden wil hy regieren, bestieren Hy is die weert, diet ghelt verteert Hy roept om groote vieren. Alst vriest en sneeut so hangt zijn baert vol keeckelen, Dat soute vleesch eet hy al wt die peeckelen Al wat wy connen sparen, voorgaren Int oude Jaer, verslint hy gaer Gheen ghelt can hy bewaren. Hy mach wel eeten en niet luttel drincken mee Die langhe nacht leyt hy al ouerdinckende Och hadden wy vastelauent, wy gauent Compt Valentijn, haelt ons goe wijn Dan hebben wy Paeschauont. Die Mey verdrijft de Winter wten Lande veer, So mogen wy gaen spancieren die warande weer Die coud duerde wat langhe, seer banghe Nu sparen wy thout, ten is niet cout Die winter is voorganghe. Die Mey doet alle bloemen weder bloeyen net Die Mey doet alle dieren weder groeyen vet, Die cruyden laet sy wassen, seer rassen Der Beesten mont, vervult terstont Sy gheeft ghenoech te brassen. Die soete Mey die dierkens oock te samen paert Een manneken ende een wijfken elck na zijnder aert Sy toonen dan haer crachten, met machten, Godt heeft gheveucht, met groot gheneucht Vermeerdert v gheslachten. Die coele mey becleet dat wout met groene Drie maenden staet hy weder int saysoene [Folio 4] [fol. 4] Sy gheeft die vogelen weder // haer veder Die Nachtegael // singt haren tael Die koekoeck singt oock weder. Nu volcht den Oogst drie maenden so meer duerende, Dan is den Ackerman zijn broot besuerende Dat gras, en cooren, maeyen // seer fraeyen Tsy taru, of cooren // laet niet verlooren, Hy mach oock weder saeyen. Als nu die Son den Leeu begint te rakene, Dan ons oock alle vruchten seer ghenaekene Die Son die climt hooghe, tis drooghe Looff en cruyt // heeft dan virtuyt Den mensche te gevoeghe. Aensiet die Mierkens en die Beykens sempelle Sy geuen v vande naersticheyt een exempelle Hoe dat sy connen sorgen // voor morghen Die Somers spaert // swinters welvaert Soo darf hem niemant borghen. Hier mee so compt die Somer ooc ten eynden Den dach beghint te corten en te weynden Die Son met haren stralen // gaet dalen Dus werden wy quijt // die soete tijt Wie canse weder halen. Voort compt den Herfst twaelf weken duerende Dan zyn vervult die bergen en die scheuren nie Des sullen wy Godt louen // hier bouen Hy heeft verleent // meer dan ghy meent Veel meer dan wy behoeuen. Een craenen Somer met een heeten sonneschijn, Dat doet den oogst wel rijpen, en maect goeden wijn Doet Appelen en Peeren // vermeeren T'wert al planteyt // voor ons bereyt Veel meer dan wy begheeren. Van als moet ghy v koecken wel stofferen Met turff en hout v solder wel formeren, Botter en Kaes gaen coopen // by hoopen Den Os int sout // daer toe goet mout Dat Vercken laet niet loopen. Die coude Winter comt ons weer hier buytene Hier me wil ick mijn Rijmen gaen besluytene, Maer als ghy zijt gheseten // ten eeten, By een goet vier // drinckt Wijn en Bier Wilt Lazarum niet vergheten. FINIS. Vorige Volgende
Auteursrechtvrij Auteursrechtvrij Auteursrechtvrij
Auteursrechtvrij
Auteursrechtvrij