Nederlandse historische bronnen 10
(1992)–Anoniem Nederlandse historische bronnen–2aen gerardt michiels ende lysbeth van enckenvoirt syn huysvrouwe wonende tschertogenbossche synen weerden swager ende bemynden suster tschertogenboschGa naar voetnoot4 Rome, 15 maart 1515
Weerde bemynde swager ende suster, Ick heb uwen brieff ontfaen, geschreven den Vsten dach Februarii op den VIIsten dach des tegenwoirdiger maent Marte, wair uyt ick verstaen ghij metten kynderen ende vrienden noch gesont syt als ick by der gratien Gods oock ben met mynen dienairs. Oeck verstaen ick dat onse moye Catheryn Myss hair verstant verloeren heeft ende nyemant en kent. Dat is my van herten leets begerende van u dat ghij hair van als wess sy behoeft uytreict ende betaelt ende op myn rekenscappe schryft. Want ick hairen persoen begeer te syen | |
[pagina 9]
| |
eer sy oft ick sterven, eest anders den wille van Goede. Ich hoep daegelixs te moegen vertrecken van Romen om by u te coemen, dan een obligatie van tweeduysent ende tweehondert ducaten by my gedaen voir den archidiaken van Campelant die vertrect myn reyseGa naar voetnoot5. Doch ick hoep by der hulpen van Goede eens dair van ontslaigen moegen weerden. Voirt ghij schryft van uwen twee soenen tot Loeven, hoe dat se by raede van den deken ynt collegium theologorum getrocken synt, dair ghy hoept dat se wel geguberneert sullen syn. Dan ghij en schryft my nyet dat Wilhelmus nyet wel te passche en is, gelyck anderen uyt Loeven my schryven, dat hy nyet sterck en is. Ick wolde wel dat ghij my u goetdoncken schreeft. Ick heb op synen persoen een offitie dat men huyden op desen dach vercoepen mach tweduysent gouden ducaten, maeken vierduysent gulden Brabants. Oft u geraeden solde syn dat ict vercoft oft van synen persoen stelden. Ick saech gheerne dat hy offitiael tot Roemen bleeff. Nochtant solde van synen persoen pericule syn, en wolde ick nyet gheerne syen het offitie verloeren gaen. Dochtet u ende myne suster geraeden, ic solde hem by my tot Romen doen coemen tegen desen toecoemenden September, wair ick solde hoepen hem te moegen doen cureren ende oeck dat hy by veranderynge van de locht van synder siect ontslaegen solde weerden metter gratien Gods. Ic heb raet genoemen met diversen medicynen welke van mynder opinien syn. Daerom denct hier op ende schryft my uwen synne oft geviel dat ick desen soemer by u nyet en conde gecoemen. Mach ick coemen sullen wy alsdan tesamen spreeken. Tgeen ick u hier schrijve, dair van en segt nyemants die leestGa naar voetnoot6. Als van den huyse tot Loeven, ick heb u wel verstaen ende sal my van als seer corts vercleerenGa naar voetnoot7, nyet en twijvelt. Ick hoep dat uw gheen ongelyck geschieden en sall. Dat ghy schryft te Loeven geweest ende yn mynen huyse gheeten nocht gedroncken te hebben, dair hebt patientie mede. Mr. Johan van LoemelGa naar voetnoot8, eer ghij my geschreven hebt, hadde syn excusatie gedaen by een synen brieve hoe hy u nyet ontfaen en mochte om den ambasiatoer van IspanienGa naar voetnoot9 die yn mynen huyse gelogieert wass. Aldus laetet ongemerct. Allen dynck hoep ick sal ten besten coemen. Gebiet my tot mynen heren deken ten BosscheGa naar voetnoot10 hem seggende dat syn dienair | |
[pagina 10]
| |
seer corts gedient sal syn, gelyct blyken sal by der bullen die ick hoep te seynen metten yersten boede. Item ick seynde by brenger van desen boede den ick heb doen leenen twee gouden ducaten te betaelen ten susteren van OrtenGa naar voetnoot11. Helpt gedencken dat sy corts betaelt weerden. Een bulle van afflaet voir het cloester van Vredenberch by BredaGa naar voetnoot12 die sult ghij aldaer bestellen. Ende is uwen wech aldaer gelegen, soe draechsche selffs, want ick en twyvel nyet ghy en sult dair van groeten danck hebben, want ick schenck den cloester allen den cost die dair op geloepen is, opdat sy voir my bidden. Segt hen dat myn suster oeck gesolliciteert heeft voir het cloester. Ghij en sult nyet betalen voir die draechloen, want ick hebbe desen brenger meerder dienst gedaen. Van den huyse te coepen in die PeperstraetGa naar voetnoot13, my donct dat ghij dair toe cleynen synne hebt. Aldus laet ict aen staen ter tyt toe dat ick by u coemen. Ende hier mede syt Gode bevoilen. Geschreven met haest uyt Romen den XVsten dach in Merte 1515, U broider bekant.
Anno XV ontfangen den VIIsten dach Meye. |
|