Politikke consideraties
Euver de zake van dezen tied.
Doa weurt allewijl veul allegatie gemaak euver de kwestie van de separatie. Noe, doa heub ig niks tegen, en ig dink oug dat et ein schoen dink zal zien, as zoe eeder provincie op zich eiges zal zien, en um zoe te zegge ze moos en eer lappele allein magge koken. Doarum geef ig oug mien gansche stum um Limburg mair zoe veul te separere as het meugelik is, en zelfs nog mie.
Oangezeen ig dan zoe 'ne partisan bin van alles op zen eigen hand te doen, zoe wil ig nog e bitteke veerdor goon, en ug ein propositie make gehiel in 't belang van de provincie.
Alle minsse weete dat Mastreeg en Wiek ein stad oetmaken, en onder de administratie stoon van denzelfde burgemeister. Noe, dat vin ig benkelik verkierd, en ig proposeer dat men Wiek van Mastreeg zou oafsnyen, en eeder van dees ploatsen einen ganschen burgemeister geve; dit zou veul pleseeriger zien as mer einen burgemeister onder twieë te verdeilen, zoe dateeder mair ei stukske heet.
Alle twie heubbe doa een het groetste belang. Van den einen kant zou Mastreeg ontlast zien van de administratie van Wiek, woedoor dan oug alles veul gemeekeliker zou zien, en de directie wie op reedjes zou oafloupen. Doa zou oug ein groete ekonomie veur Mastreeg in zien; want, zeet ins noa alles wat ze neet zouë konne spoaren! Ten ierste zouë ze gein trabanten mie veur Wiek mooten betoale; ten twiede zouë ze de Wieker lanteeres met geinen olie mie mooten veurzien; ten derde zouë ze geine commissaris van politie in Wiek mooten onderhauwen; ten veerde zouë ze noets mie de keië van Wiek doen verbeteren, opdat de luy er den hals neet zouë euver breken; ten vyfde... mer ig zou noets gedoon heubbe, wannie ig alle de avantages wou opnummen die oan de separatie van Mastreeg en Wiek zouë verbonde zien.
Van den anderen kant, zou er Wiek oug neet oan verleeren. Um de separatie compleet te maken, zou men de bruk op de Moas mooten op de grond goeijen. Dan zouën er ponten euver het water varen, en Wiek zou allein het geld veur het euverholen moote ontvange. Dit zou joarliks ein klein revenuke opmaken van ten minste f 20,000 nederlandsch. Boven dat zou Wiek nog ontlast zien van de schuld van Mastreeg, woe in ze noe ein deil betoalt; dit zou op neuits ein ekonomie zien van joarliks f 5,000 nederlandsch. Ten andere, Wiek zou dan oug haar eige belastinge, zoe wie octrooi, accys, enz., enz., konne ontvange, wat heur al weer ein bezuiniging kaan opmaken van f 50,000 nederlandsch. Met nog ei bitteke mie op den maoneschien te rekenen as men in Mastreeg doot, zou me nog gemekelik f 20,000 nederlandsch oan olie van de lanteeres konne oetwinne; en dat is oug wel de meuite weerd. Enfin, me zou zoe nog doezende kleine ekonomiekes konne oetvinde, woedoor Wiek zoe riek zou weurden, dat men oan eeder inwoener joarliks ei klein pensioeneke van f 1000 nederlandsch zou konne oetkieren.
Dat het veurdeilig zou zien veur Wiek en veur Mastreeg, van zig te divorceeren, dit schynt mig oetgemaak, of um mig op zig frans oettedrukken: c' est un fait acquis à la question.
Het is wel meugelik dat den eine of den andere chicaneur de cieffers die ig opgenomme hub ei bitteke vergroet zou vinden; mer oan dee keel moot ig zegge, dat ig heum verach, dat heer eine bureaucrate en eine vyand van ze land is, en dat ig mig onder de protectie van de wet zal zette.
'ne Wiekeneer.
Auteursrechtvrij