Moetete (1968)

[p. 2]

R. Dobru
A feti foe Gado Sabi

Boni vs. Fourgeoud

Na ini den jari 1772 kon miti 1777, wan kapten di den kari John Gabriel Stedman, ben teki prati na ini a feti foe makti den lowenengre na ini Sranankondre. A Ingrisman ben de kapten foe den matrosi foe Kononèl Fourgeoud, wan Swiska.

Stedman skrifi fo boekoe. Na ini den boekoe a froeteri foe a feti di den sroedati ben feti nanga den lowenengre-guerilla ini den boesi foe Sranan. Wan foe den edeman foe den lowenengre na a ten dati ben de Boni.

Na ini den boekoe Stedman ben skrifi foe ala sani san a ben miti na ini den boesi: meti, fowroe, bon, froktoe, fisi. A ben skrifi toe foe ala tra sani san a ben miti èn jere na ini wi kondre: historia sani, den libisma, friman nanga srafoe, fa a kondre ben prati.

A ben meki karta nanga skedré foe libisma nanga tra sani, poti na ini na boekoe sosrefi.

Den boekoe foe Stedman na a kaba foe den 18 jar' ondro ben poti abra na ini doisri-, fransi- nanga olansi-tongo.

San m'e go doe na broko-broko wan pisi foe den tori foe kapten Stedman poti gi oenoe na ini Sranan-tongo. A pis di m'o froeter baka dja, na a tori foe na feti nanga den Maron-guerilla foe Gado Sabi, na fortoe foe gran-edeman Boni, na awgoesto 1775. Na ini joeni foe na sèm jari, den Maron ben fon kiri 140 sroedati foe na kapten Meyland, sodati san ben tan abra foe den, ben abi foe draibaka, ala di den ben sabi now pe Gado Sabi ben didon. Gado Sabi ben didon na ini wan swampoe na sekanti, tapsé foe otka liba kon miti Marwina liba. Den guerilla foe Boni ben kiri psa afoe foe den sroedati na ini den swampoe di ben lontoe Gado Sabi. Now Fourgeoud ben abi na ondro den se-sroedati, soboen matrosi foe en, so toe wan Kompagni Redimoesoe, bai nengre di b'e feti na a sé foe den blaw-ai.

Den wiswasi nengre disi b'e angri foe go feti nanga den Maron foe Boni foe di den wetman b'e gi den moni. Den wetman b'e pai den 25 goloe foe ibri anoe noso ede foe wan loweman di den ben tja kon, nanga 50 goloe te den ben feni wan foe den tanpresi foe den Maron. Dan now den Redimoesoe ati b'e bron nanga Fourgeoud, foe di a wakti te nanga awgoesto fosi a bigin teki boesi.

A pis tori di e kon now poeroe na ini a boekoe di'f dri foe J.G. Stedman. ‘Reize naar Suriname en door de binnenste gedeelten van Guiana’, pagina 1 te nanga 40, foe den olansi wan:

[p. 3]

Den Maron ben fir tranga, foe di den ben fon kapten Meyland. Spai foe den ben piki den taki Kolonèl Fourgeoud ben de na Barbakoeba. Foe skreki den sroedati foe oenoe, den ben bron toe kampoe di den waktiman sroedati ben libi na baka na ini a boesi; dan den ben meki wan bigi babari er neti te dé. Disi ben psa den 15 awgoesto 1775. Ala di na soso dregi den b'e drégi, a edeman foe oenoe ati bron so te, taki a sweri taki awans san kon a ben sa poeroe a fasi gi den nomonomo. A tamara foe en oen tek boesi. Oen ben abi toe ondro wetman sroedati. Oen ben libi wan lo na baka nanga ala sortoe siki. Den Redimoesoe no ben sor fesi. Foe a san dat' ede Fourgeoud ben kos den taki na soso mofo den abi, na frede den frede soso. Ma mi ben sabi taki na den order nanga na langa wakti foe na Kolonèl b'e froefer den Oen b'e waka go na a sé pe son e opo, dan oen meki wan pisi foe aiti kilométer, san a no joe boi ef joe sabi taki joe abi f' broko boesi foe mek pasi. Mek mi froeteri fa den Maronnengre b'e loekoe: Den nengre disi e tja wan ambéri nanga wan gon. Den w'wiri frekti plata na tap den ede, foe sori na difrenti nanga den Redimoesoe èn tra nengre srafoe. Den e weri barba, foe di den n'a ten foe kraboe en. Den krosi na wan pis katoen lont den skowroe, di d'e srib a tapoe, nanga wan kamsa. Moro fara d'e tja wan gonsaka, di meki foe wan metib'ba èn d'e weri obia banti lontoe den anoe, foetoe nanga neki. Den Redimoesoe joe ben kan difrenti na den redi ati di d'e weri na den ede. Ma son lési den Maron b'e tek den moesoe weri, someki ini a faja foe a feti joe no sabi soema joe moes soetoe. Wan tra fasi de toe di den b'e kis oenoe. Den b'e kon na joe tapoe nanga oedoe gon, koti lek gon srefi, so meki ef joe no de foeroe j'e set lon tak den tranga moro joe. Den san disi mek den b'e kir wan lo foe oenoe, bron pranasi sondro wan man prefoeroe fet anga den.

Den 16 awgoesto oen drai baka tek wan tra pasi go now pe son e dongo. Oen no b'e kot bon moro, oen no b'e mek faja moro, someki den Maron no ben kan sabi sortoe sé oen de. Ma ef den Maron no ben de na oen tapoe, maskita so dobroe. Wan f' den nengre srafoe di oen b'e tja ben ler mi taki if joe go srib in wan bon, maskita no e njan joe so, ne joe si mi kon njan wan pkin ai. Den trawan b'e dik olo na in gron go d'don na ini. Trafasi joe no ben kan sribi. Déten dati na mira, di te den bet joe agers na faja watra den trowe na joe skin.

A tamara oen kot pasi ete wan lési foe go doro den swampoegron now. A dé dati oen tapoe den fo joeroe ten bika kolonèl ben d'don nanga kowroe korsoe. A neti dati wan alen wiki mi poer mi na ini mi amaka mindrineti, ala di den Maron b'e meki wan bigi b'bari nanga gon anga mofo, someki a her neti oen no sribi moro te mamanten. Mamanten oen bigin waka go na sekantisé, pe a b'bari ben kmoto a neti.

Kolonèl no ben man waka boen srefi foe di korsoe b'e nak en skin ebi. Mi si wan spai foe den Maron ma mi no ben kan soet n'en tapoe, bika kande mi koegroe b'o kis wan f' den sroedati foe oenoe di ben

[p. 4]

las pasi. Oen las dri foe den. Mi denki tak den soengoe na ini na swampoe, bika wi no si den moro. Di a Kolonèl jere tak mi si wan foe den Maron, a froegit a siki èn bigin waka moro esi.

Aladé wan toe sroedati b'e dede na ala sortoe siki, soleki beti foe boesanansi di bigi lek mi anoe. Oen no ben man ber den boen srefi. Bigi olo oen b'e diki trowe den na ini.

Den 19 awgoesto oen drai baka dan oen go pikinso n'a sé pe son e opo dan den tin joeroe ten oen miti nanga wan ondro foe den Redimoesoe nanga den kapten Finsack. San foe bréti Fourgeoud ben bréti, bika oen ben doro wan dri ondro man now èn sotoe foe di den Redimoesoe ben sabi feti den Maron moro boen moro den weti sroedati. Wan Redimoesoe ben sari siksi foe den wet sroedati.

Bakadina oen kon miti den bigi swampoe. Den swampoe tapoe nanga wan sortoe groen-groen di e tja wan man. Ma efoe joe saka psa na ini, joe lasi. Oen las nofo man baka na ini den swampoe disi. Fos neti tapoe oen miti nanga a swampoe pe den Maron ben fon kapten Meyland nanga den sroedati f'en. Oen ben waka a pasi di en ben kot libi na baka. A neti dati mi njan nanga na Redimoesoe kapten Hannibal.

Hannibal froeter mi fa den nanga den Maron e feti. A taki den e feti na ini groepoe foe tin-tin man. A edeman foe den tin e tja wan toetoe nanga san a e gi order. Den e go d'don plata na baka bon. Wan e soetoe èn toe e jep en lai en gon. Te a wan di e soetoe dede, wan trawan e tek en presi èn a di f'toe e tjar en dede skin gwe foe a no fadon na féjanti anoe.

Hannibal taki toe taki na a kondre foe Boni oen b'e go miti tamara. A taki Baron e feti na ondro Boni now. A froeter mi toe taki a feti nanga foeroe Maron edeman sensi a de na ini Redimoesoe, soleki Kromanti, Kodjo, Ariko, Joli-Coeur, Kwami. Na en froeteri mi tak Boni no si dé na ini sraften.

En p'pa ben de wan wetman, en m'ma wan nengre oemasrafoe. En m'ma ben lowe go na boesi nanga bere, foe di a no ben man tjari na fonfon moro di en basi, Boni papa, b'e gi en. Soboen Boni ben de wan malata. Morofara Hannibal ben gi mi den nen foe den tanpe foe den Maron. Wantoe foe den ben bron kaba, trawan na soso nen a ben sabi èn wantoe foe den ben de na wi fesi. So joe abi BOEKOE, san wan taki, mi sa boekoe fos joe wini mi.

GADO SABI: Gado wawan sabi pe mi de, nanga KON SAI, TESI MI, MERI MI BOESI KRé, MI SA LASI, KIBRI MI e.s.m.f.

Den 20 awgoesto mamanten oen bigin njan swampoe. Abrasé den Maron b'e wakti oenoe. Di oen miti wan pis drégron, oen si wan sani di tapoe skreki gi wan lo foe oenoe. Oen miti wan bigi ipi dedebonjo nanga dede-ede na oen fesi. Bonjo nanga dede-ede foe den sroedati foe kapten Meyland. Den Maron ben diki den poer baka na in den grebi, dan den kot-kot den pis pisi foe skreki trawan di ben sa waka na sèm pasi. Foe tak leti, mi skin ben goenjan now foe feti, ma den tra sroe-

[p. 5]

dati djakti ben tek faja foe poer wraak. Sergeant Fowler dat ben brokosaka te; en fesi wet-weti foe soso skreki. Mi sen en foe go na baka - t'té, baka di mi ben bar en. Pe a ben tanapoe a no ben man kibri tak a ben frede, béfi so lek bon w'wiri te winti wai.

Psa swampoe a no joe boi kaba. Watra te na joe borsoe.

Nanga ala den sani di e lontoe joe. Dan joe moes prakseri san e psa te den Maron fadon na joe skin let mindri so wan swampoe. Wan lési nomo joe kan soetoe. Joe no man lai gon nanga watra te na'j borsoe. Na so den kiri den man foe kapten Meyland.

Moro nanga moro oen b'e si sani now di b'e sor oenoe taki w'e doro a fortoe Gado Sabi. Oen miti wantoe Maron nanga warimbo manki, lai nanga alési. Di den si oenoe den fringi den maki na gron, dan den lon. Soboe na froisi den b'e froisi kaba k'moto na Gado Sabi.

Dan oen kon feni wan foet-pasi. Sotoe oen kon feni wan waktimankampoe, di Maron-waktiman ben lon libi na baka. Bakadina mi nanga majoro Medlar kon mit wan alésgron. Nomo oen jere gon piki toe lési, san ben de wan warskow gi Boni taki ofara oen ben de. Dja oen tapoe foe wakti den tra sroedati. Den Maron ben kan maskader oenoe, bika aladati oen no ben sabi taki den ben lontoe na alésgron. Den tra sroedati ben de boen fara na wi baka. Di den doro, a ben tek wan af joeroe, wi kot pasi gwe na boesi. Wi no ben waka wan leti, nomo faja bigin mit oenoe foe alasé Kapten Fowler ben kis en srefi now, a ben de te na fesit'té, a feti na mi sé nanga boen dekati. Den Maron b'e ar go nanga baka. Wi b'e ar go na fesi, te oen kon miti wan bigi alésgron nanga lepi alési. Baka na alésgron oen ben kan si Gado Sabi. A ben de wan sani foe si: Na alésgron na wi fesi. Dan let na baka na alésgron, na ondro kowroepe foe wan lo bigi bon, wan lo oso. Trawan nanga sodro. Den Maron ben lontoe den kondre nanga skotoe, meki nanga bon tapoe makandra. Na baka na skotoe den b'e kibri soetoe na oen tapoe, ala di wi ben de na ini opogron. A feti teki pikin moro wan joeroe. Wan koegroe broko kapten Fowler gon; wan kot na lerbanti foe mi lieutenant De Cabanaus en gon, wan trawan tek mi na mi skowroe. Ma wan sani b'e psa di mi no ben man froestan. Ala di koegroe b'e boro boro den sroedati foe oenoe f' alasé, trawan te foe dede srefi, tokoe no wan b'e fadon na gron. Ma bakaten fosi mi b'o sabi foe san ede. Moro nanga moro wi b'e kon na den tapoe. Ma mi moes taki mi b'e gi den general Boni grani foe na fasi di a b'e feti. Sosrefi mi moes taki foe na law di den fetiman foe den b'e law, e djompo nanga soso borsoe na wi fesi, langa-langa so na fesi wi gon, taki den abi obia foe tapoe koegroe. Lek wan foe den dati. Mi bri fo noso féfi tron a djompo kon na doro, tanapoe langa-langa na tapoe den bon e soetoe kon leti na mi fesi. Te joe si wan foe den sroedati foe mi, Valet, soet en trowe, djompo na en tapoe, pot en gon na in en jesi, d'a bos en ede poer a wan. Wan lo foe den oen kir sofasi, obia a no obia.

[p. 6]

[p. 7]

KARTA

1.	Barbakoeba - sribipresi foe den sroedati foe Fourgeoud
2.	èn 3 pe den 27 awgoesto neti oen jere den Maron b'e soetoe meki b'bari.
4.	èn 5 pe den Redimoesoe kon mit oenoe
6.	sribipresi fos na feti
7.	Pe den Maron fon kapten Meyland
8.	waktiman foe den Maron
9.	èn 10. alésgron, pe den bigin soet na oen tapoe.
11.	Alésgron
12.	Gado Sabi
13.	Pe na neti oen ben taki nanga den Maron
14.	Kon Sai - pondo
15.	njangron
16.	Alésgron
17.	njangron
18.	swampoe
19.	swampoe
20.	boesi.

Solek fa oen ben de so foe teki na kondre, let na wi fesi so, wan foe den kapten tanapoe nanga bigi dekati, soet faja gi ala den oso. Den oso ben tapoe nanga pinablad, someki fos joe ter tin faja ben lontoe wi. A ben de wan sani foe si den kampoe e bron, smoko foeroe a kondre, dede lontoe oenoe. A ben warti wan skedré. Na faja disi ben tapoe oenoe foe gwe doro na den Maron baka, di na ini den joeroe dati b'e eskép nanga den oema, pikin, oso sani nanga njansani. Oen ben wini, ma oen no ben kis a tjans foe doe den sani di winiman gwent doe.

Di a faja saka, oen wasi, njan, dan oen saka didon na ini wi amaka. Aladi den Redimoesoe b'e pré bal nanga den ede foe den dede Maron, di ben tan didon de. Fourgeoud ben weri toemsi foe tap den nanga na pré dati, di den taki na den kondre fasi. Den Redimoesoe b'e tek den kakoembe e smoko foe tja go na foto go sori den famiri.

Bakaten den Redi-moesoe froeteri oenoe taki den miti broedoe na sé boesi foe den Maron di wi ben gi mankeri.

Oen no ben rostoe nofo ete, den dri joeroe ten, nomo wan groepoe foe den Maron bigin soetoe na wi tapoe baka. Ma baka di wi foe wi sé piki den dan den ar gwe. A neti dati oen no let faja. Oen no ben sribi wan boen fasi ete, nomo a bigin baka agen. Kwakoe, wan foe den srafoe, bari gi mi taki: ‘Masra, boesi nengre! Masra, boesi nengre!’

Mi trowe mi srefi plata na gron. A ben sori leki den Maron ben de let na mindri oen kampoe. Na mi sé pe mi ben prakseri taki na dedewan foe wi didon, mi jere wan grangrandiri, di d'e kar Thompson, bari gi mi taki ef mi prefoeroe opo mi ede, mi na dedewan. A taki Fourgeoud ben order alaman foe tan didon, foe di oen no ben abi nofo kroiti èn oen no b'e si na féjanti. Na so oen tan didon na ai, te mamanten son opo.

[p. 8]

A er neti dati den Maron nanga den Redimoesoe b'e kot odo gi den srefi, kosi den srefi.

Den Maron b'e kos den Redimoesoe taki den wiswasi, tak d'e seri den égi kondreman. Den b'e kar den foe kon feti den na den wawan. Den sweri taki den angri foe was den anoe na ini na broedoe foe den sakasaka dati, taki na foe den Redimoesoe ede meki den lasi den moimoi tanpe.

Den Redimoesoe foe den sé piki taki den Maron a no noti moro leki soso foefoeroeman nanga abani di ben lesi toemsi foe wroko, mek den lowe k'moto foe den pranasi, taki ef den prefoeroe sor fesi den sa kir den so fjafja.

Ten na ten Maron b'e opo faja na wi tapoe, dan den b'e singi winiman singi, meki b'bari, her neti te dé. Bakaten Fourgeoud srefi go tek prati na ini a tori, pe mi nanga kapten Fowler b'e pré torkoe gi en. Oen ben moes bari boen tranga, ma noiti ete mi ben prisiri so.

A kolonèl pramisi den Maron taki a no ben sa go kir den, a ben sa go gi den fri, njan nanga alasani di den abi fanowdoe.

Den bar lafoe, piki taki den no abi en fanowdoe, taki en na lowe-fransman, taki a no b'abi foe njan srefi. Den pramis en taki ef a ben wan kon na den, den no ben sa doe en noti, den b'o gi en njan srefi.

Leki mi nanga Fowler dati, den taki tak d'e sar oenoe, taki wi na weti srafoe, di erger moro den srefi, bika wi b'e mek den soet oen kiri foe fo loto wan dé ede, taki oen b'o dede foe angri bere. Den taki dat den no fen taki wi ben warti den kroiti srefi. Den aksi foe oen seni den masra foe den pranasi kon feti nanga den, tak no wan foe den dati b'o k'moto libilibi na ini na boesi. Sotoe den pramisi foe kiri ibri wan foe den Redimoesoe, di den ben sa kisi.

NA A KABA FOE A TAKI DEN BARI GI OENOE TAKI A NO SA TEK LANGA MORO DAN BONI SA TRON GRANMAN FOE SRANANKONDRE.

Baka na taki disi, dan den soet gon, dan den bari dri lési. Den Redimoesoe bar piki den, nomo alasani kon tiri. Den Maron ben ar gwe.

A kolokoe di wi ben abi taki foeroe foe wi no dede, na foe di den Maron no ben abi koegroe. A pis ten den datra foe oenoe bigin dresi den mankeri foe den sroedati, den kon si taki den Maron b'e soetoe nanga pikinston, koproknopo, koprosensi. Den sani disi b'e gi pikin olo nomo di e dresi esesi. Morofara den no ben abi fajaston, ma nanga pispis broko isripatoe den b'e nak let den gon.

Slòf oen ben slòf so, noso mi no ben sabi san b'o psa nanga oenoe. Den kèl b'o kir oen feradelek.

Di a gers den Maron ben gwe Fourgeoud gi order foe oen bigin bron den njangron foe den. Dan a seni kapten Hamel nanga wantoe matrosi makandra nanga Redimoesoe foe go feni fa a doe kon taki den Maron ben man psa swampoegron so makriki.

[p. 9]

A kapten feni wan sortoe kibripondo pe wanwan man nomo ben kan abra.

Di den Maron si den, den bigin soet baka, dan den ar gwe.

A tamara f'en now, di wi abra na broki nanga moro foeroe sroedati, ne wi kon si san na a b'bari di den kèl ben meki na neti. A no ben de wawan foe or oen t'napoe, ma sosrefi foe oen no ben kan si tak na froisi den b'e froisi eri njangron na ini warimbo manki. Ala den gron na dat sé pikin moro ben kalikali.

We Fourgeoud ati no bron f'toesensi jèrè. Taki sma di wi gwent e kari wèrdersma kis en na so wan fasi. Dan a sweri taki kir a sa kir Boni nomonomo, awansi a ben sa abi foe ar go na a kaba foe grontapoe. Ala oen lai, njan nanga kroiti, ben kaba. Ma Fourgeoud no ben wan gi abra. A sen kapten Bolts nanga wan ondro matrosi moksi nanga dritenti Redimoesoe taki den moes teki wan wiki lai na Barbakoeba kon, foe a kan ar go doro na Boni baka. Na ini a ten dati oen di b'e tan na baka b'o njan afoe nomo foe san oen gwent njan. A sen oenoe foe go fon alési, san ben de wan toemsi ebi wroko. Foe di oen ben weri kaba, dan oen no gwenti baka.

Mofoneti mi piki kolonèl taki mi si wan toe nengre nanga gon e kon. Fourgeoud skreki, bari taki: ‘Dan oen dede’. Wanslag a bari gi den sroedati foe grab den gon. Pikinsomoro oen kon si tak na wi man, Redimoesoe trawan b'e tja trawan na ini amaka na tapoe skowroe. Nomo Fourgeoud bari baka taki ‘Tok a kon g'oenoe, awansi a no féjanti e kon. Na kapten Bolts e kon, den fom en.’ Fourgeoud b'a leti.

Kapten Bolts froeteri tak na a sèm presi na ini a swampoe pe den Maron ben fon kapten Meyland, na a sèm presi den Maron kir psa afoe foe den Redimoesoe sondro foe loekoe den tra sroedati na wan ai. Den kiri na Redimoesoe kapten Valentijn fos a ben man bro en toetoe. Féti koegroe ben boro en skin, kapten Avantage, brada foe Valentijn, ben kindi na sé en brada skin soigi a broedoe, sweri tak a sa kiri den Maron nomonomo. Ma let dape en so toe den ben poer a pasi. Na so kolonèl Fourgeoud kon si taki den Maron ben doe san den taki, taki den b'o kir den Redimoesoe. Sotoe kapten Bolts ben froeteri tak den Maron b'e soetoe k'mopo na ini den palmbon lontoe na swampoe. Dan solek fa den soetoe, d'e grat saka esbiten, gwe na boesi baka.

Fa a waka ef fa a no waka, Fourgeoud ben si tak a no ben sa man go doro nanga san a ben pot na en ede. Na a fos presi oen no b'a njan sani èn oen draibaka pasi ben koti. Moro fara oen ben weri, foe di dé nanga neti oen ben abi foe tan na ai. Ala den sani disi mek Fourgeoud si taki na kir a b'o tja den man foe en go kiri, ef a ben taki foe go doro na Boni baka. Ala san oen ben kan doe, na bron den njangron doro di wi ben feni ete na a presi di den kari Kon Sai, dan oen tek

[p. 10]

pasi draibaka kon miti Barbakoeba. Disi oen bigin doe lati bakadina foe den 24 awgoesto.

Kolonèl Fourgeoud ben doe wan sani a neti dati di mi sa kari fowtoe, ala di mi sabi taki tra sma sa kar en tra fasi.

Di wi kon miti na ogri swampoe, Fourgeoud tek wan kisi, pot en amaka na ini dan a or en n'en fesi waka go na ini a swampoe, taki: ‘Ala man foe en srefi’. Di a tak so, dan wan foe den sroedati, di den kari Mattow, tan t'napoe, a tak: ‘Mi kolonèl, foeroe no de na wi mindri, di abi wan kisi foe tap den koegroe. Wan boen fet'man no ben sa wani doe san joe e doe dape. Mek mi sori joe fa wan fetman e tjar en srefi na ini den okasi disi. Waka na Mattow baka, no frede’. Dan na dekatsroedati disi, pir en borsoe opo, poes en bajonet na fesi, dan a kren na sjoro. Alaman waka na en baka, ma noti oen no miti. Mattow tron sergeant.

Na so a tratamara f'en den 26 awgoesto 1775, oen kon doro Barbakoeba lek angri dagoe nanga wan lo sikiman.