Den minnelijcken roosen-knop

[p. 197]

Die Minnaers willen sijn van Pint, en Snellen
Die komen in 't Loth van Bacchus gesellen.

Stemme: Le bon vin est tous jour che moy.

COmpeer ick sweer u voor gewis,

Als ick den wyn , en Toeback mis

Dat het met my geen deegh en is,
Voor-waer ellendigh is den Man
Die geen Lief-hebber is daer van
Om uyt te vegen eene kan.

2. Compeer 't en is voor-waer geen pyn,

Een nachtjen over vrolijck sijn
Met een Cnuysken inden wyn:
Wat droes, waer isser meerder vreught
Als datmen soo sijn eerste jeught?
In dat edel nat verheught.

3. Compeer die daer u jeughdigh lijff

Gaet binden aen een tydt verdryff,
Een Grim kaus, oft leppigh wyff,
Dîen acht ick par ma foy niet fijn,
Die soo een Griet oft quaede Lyn
Liever kiest als desen wyn.

4. En is het dan niet wel geclaert?

Sy tiert, en vlieght hem inden baert,
Gelijck toch is het Vrauwen Aert:
Compeer ick bid u haut u vry,
Eer dat u vryhyt comt in lij
Wacht u wel van soo een Pry.

5. Ick segh, en sweer u dan Compeer

Dat ick den Ticktack, en 't verkeer,
En 't Casken veel meer exstimeer,
Voor my, k'en Trou ick nimmermeer,
k'Hau vande gulde vryheyt meer
Adieu Compeer, comt morgen weer.