Middelnederlandse geneeskundige recepten

1324.aant.

Heuet die mensche die⁴³ siecte langhe ghedreghen, soe is sijn leuere bleec, soe salmen nemen hertstonge een half vierdel loets, alsoe vele [fol. 106^r] rosen een loet, ende fiolen, Cassia fistula, latricien sap, deser .iij. een loet, ysopen eenen haluen vierdinc⁴⁴, anijs alsoe vele, dragant .S. loet; dese cruden salmen nemen ende sieden in eenen aerdenen pot daer salmen toe ghieten vier beker waters, ende laten dat half versieden. Soe salmen ander werf in ghieten .ij. beker waters, ende latent eenen beker insieden, ende zien dat doer eenen doec in een reynne panne, ende laten dat ouer zieden, ende doe daer toe dat witte van eenen eye, soe luceret; sie die siroep daer toe, doe in .S. marc wit zukers, dat sal die zieke drinken des morghens, des middaechs, ende des auonts, eenen lepel vol te male, die wile dat die syroep waret; daer na sal die mensche sijn orijn laten sien, is die orine goudine verwe, soe betert die sieke. Soe segghe hem dat hi hem niet en vercoude. Soe saltu sine orine echter besien, is si luttel claer gout verwe, soe is hi ghenesen, soe saltu hem verbieden dat hi niet te vroech en bade, ende dat hi niet en ete herde spise, ende en drincke ghenen quaden dranc, soe blijft hi ghesont.

43 die] het Hs. heeft Die.

44 Na vierdinc staat in het Hs. anijs doorstreept.