Middelnederlandsche geneeskundige recepten en tractaten, zegeningen en tooverformules

[p. 72]

254.

Of dyacastorium⁽¹⁾, of balsema⁽²⁾ factum, of olie genivri, suldi nemen ende wriven hu aerem of lede vor een vier. of neemt levende water, ende wrijft din leden daer met. of neemt petau, ende siet daer in wulle metter hieken, ende leecht die al heet up die vercoude lede, ende bint derover⁽³⁾ een wullen cleet. Of neemt dat saet van netelen ende doet in olie van oliven, ende maecter olie of, ghelijc ghi doet van olie van rosen. ende dit moechdi doen inden zomer metter sonnen. ende hebdi tsaet, so mochdi maken in den wintre met den viere. Ende hebdi gheen saet van netelen, so neemt de wortele ende poederse, ofte doese al in sticken, ende doese inde olie zieden. ende dese olie es goet up alle vercoude saken ghewreven, ende jeghen kellinghe ende cnaghinghe van den aerme ende beenen.

(1) Hs. dya custorium.

(2) Hs. balsma.

(3) Hs. d'over.