Medische en technische Middelnederlandse recepten

1172. Emplastrum magistri petri neapolitani dar hy mede genas alle bene, alle arme dy te braken waren sonder wieken of yt toe tgaene, na dat sy gesat waren tot horen .vj. weken.aant.

Recipe in primo tsap van radeheilen woertelen .ij. ghelte, ende was .ij. ℔., dat salmen tgader syden eyn wile ende stekent dan twonde ende vergaderent tene stucke. Ende dan salmen nemen terebentyn .ij ℔., draken bloet .ij. onsen, ende .ij. onsen bolen, sefferans .j. onse, comyns .j. onsen, ende dit salmen tgader pulueren elc by hem ende dan salment werpen yn eyn coperen martyer metter helft vanden terbentyn ende werment wel ouer een. Ende dan salmen nemen dy ander helft vanden terebentyn myt dat vorscreuen was ende smeltent yn eyn panne ende doent altsamen inden martyr totten anderen crude ende alst cout is so bouuet (fol. 111^v) wel̄ myt dyn handen soe ist wel ghemact. Ende alsmen werken sal salment smeelten teendeele ende steke[n]t yn eyn lynnen doeke ende nettent wale, so salment bynden om dy broke vanden benen of vanden armen, ende der bouen leght wilt ende dan spalket ende latet liggen zyn .vj. weken sonder eet toe tgaen, indyen dat dy huet heel is.