757. Aqua sambuci sic fit.
Recipe blommen vander flederboem ende stamptse ende macter water af. Dyt water is goet geplaester[t] of gedwogen op steden dy verheittet syn ofte onsteke[n] van ouelen. Ende is goet op brant van fuer of van water ende is guet gedroncken van allen manier van water ende onstoppet dy leuer, milte, nyren, longhen ende blase. Ende tegen dat lanckouel ende den anderen dach corts, ende purgirt bouen al flegma ende melancoliam, ende purgirt alle nederwart sonder grote pyne of vreze. Het verlicht dat lichaem ende gesoden myt castorie ende dan gestreken op arteticam of opt fledersin duet sachten ende vergaen. Ende helet wonden bynnen ende buten.
Auteursrechtelijk beschermd