Medische en technische Middelnederlandse recepten

[p. 226]

720. Aqua pimpenelle sic fit.aant.

Sicut endiiuie. Dyt water is van groter virtuten want lage eyn mensche ynt quaelbed ende men wete[n] wilde wer dat hy steruen solde of toe liue bliuen, so solt men hyr van desen water doen nutten. Ende wert dat hy feyich weder van der sucten to steruen, soe soldi dat water staphans wt keren ende sout nyt quit werden. Dyt water dowet den steen seer nerwert. Item dyt water yn dy oghen gedwogen geneest se ende suuertse van alle sericheiden, als dropen van witten, van brunen, van scellen, ende genest alle wonden, olde ende nye waer sy syn, ende het commet ter wonden wt lopen ende het heilt gescortheiden dy nye ys ende alle quetsinge. Ende het is guet teghen wenyn gedroncken. Item dit crut is gedaen gelixs beuernelle, mer dy pimpenelle heft blommen of knoppen weren ende ys purper. Ende alsmen dy bladeren ontwee trect, soe yrst al haer achtich. Item dyt crut stampet ende distillirt.