623. Item syluer thoe vergulden als dy golt smeden doen.
Recipe .j. ducaet ende slaet hem dun aen stucken ende nemt .ij. loot quicsiluers. Ende smelt dat quicsiluer heet in eyn eerde comme ende als heyt is als eyn fur, soe werpt dat golt daer yn ende rurt weel om hent dat gesmolten is, soe ghitet dan tsamen yn kalt water ende nemet dan wt. Ende als ghy dan vergulden wylt, soe nemt een myssinghen langhen plaete als so breet als .j. stroe halm, dy om ende om wael gequicsiluert ys, ende stastet daer mede yn dy vorscreuen materi ende bestriket donne dar mede dat ghy vergulden wilt; ouer meer bestricket irst myt aqua fortis. Ende nemet dan een hasen woet ende stricket weel ouer ende ouer, ende latet .j. wenich int fur liggen ende nement weder wt eert root is, ende dan besyn of dye (fol. 44v) matery oeck ouer al getagen is ende wael haldet, dat daer ghen plaeste legge blyft. Dit doet .iij. of .iiij. mael hent dat het gans roet wort. Ende nemen dan dat ghy vergult hebt ende wassent schoen yn pysse of salt water myt eyn boerstel ende brunirent dan, mer erste suldi leggen yn eyn waetken daer armoniaec ende spaens groen yn ys tsamen conficirt myt water, ende haldent .j. wenich ynt fuer dathet naw werm wort, ende brunyret dan so scynnet dat alre beest golt thoe wesen.
Auteursrechtelijk beschermd