Medische en technische Middelnederlandse recepten

593. Thoe nemen eyn straet steen wtter straten ende tbreken ende weder hart tmaken.

Soe nemt een grauwe straet steen, ende smyt heem ontwe myt eyn hamer al cleyn te mortel, ende stoet hem yn eyn wysel tpuluer, ende syften doer eyn lynnen doocke als cleyn mele. Item nemt dan wyt wan eyn eye, ende menghet onder dat (fol. 39^v) meelken van dye steen, ende macht dar eyn deeghe of weel gebouuet inder manyren oft waer eyn broet deghe. Dan soe sluyt in dat deghe wat ghy wylt ende formirt dat deghe terwylle dat het moru ys yn manyre van eyn kaese of straetsteen of hoement hebben wyll, ende dan legghet yn een ouen, dart broet terstont wytgenomen ys, ende stopt deen ouen thoe, so wort hy hart als hy tvoren was myt dy hetten. Mer beter wert yn dy heete sonne diese had aelyncken gedroghet, want dy sonne gheft hem dy edelste nature. Maer dy dy sonne nyt een heeft, dy moet hem behelpen myt den ouen; dan als den ouen weder kout ys, soe yst weder eyn steeyn alst tworen was.

Item nemt wanden groeusten steyn lichsten. Dat merctmen mynste ander weruen. Item dat wyt vanden ey salmen cleyn slaen of men besycken sout yn roet ynct darmen den steen sal mede deseme[n] of formiren.